Addis Ababa:- Diru dirunkunni kalanqoonnita loosu kaayyo garunni kiirre halaalaancho taje amadate ragaanni luphiima foonqe noota Loosunna Dandoote Ministere egensiissu.
Loosunna Dandoote ministir Dieetichu kalaa Nigusu Xilahuni xawisino garinni; gobboomu deerrinni diru dirunkunni kalanqoonnita loosu kaayyo kiirranni isilanchonna halaalaancho taje amadate ragaanni xe’ne leeltanno.
Xaa geeshsha noo harinshonnino handaarunni kalanqoonni loossa tajubba isilanchimma deerra keennanni woyte xibbuunni 83% calla ikkinotanna gattinoti 17% huluullissanno tajubba ikkansa Ministir Dieetichu egensiisino.
Ministir Dieetichu kalaa Nigusu xawishshi garinni; qansoota Interpirayzootunni tantanne kalanqoonni loosu kaayyubba giddonni fiixoomunni, ga’retenni, amma’notenni, qooxeessunni calla huxxamme woloottaho kaayyo ho’latenni egennamatenni tantanne shiqinshannita ikkasenii isilanchimmate xe’ne kalaqqinota iillinoonni.
Handaarunni eeli geeshsha noo tantanora marre buunxanni yannarano tajete isilanchimma xe’nenna loosu kaayyo kalanqi gedensaanni harancho yanna giddo diigante ba’anno Interpirayzooti hee’ra handaaru loossa mixote garinni gummaame ikkitannokki gede jawa korkaatta ikkitino yiinohu Ministir Dieetichu; kurinna labbanno qarrubba tirate hajo la’annonsa bissanni ledo qinaambe loonsanni hee’noonnita kulino.
Wole widoonni Baankubba Biheeraawe Baanke hajajjanno garinni Interpirayzootaho liqoote owaante uytanni nookkita Ministit Dieetichu xawisino.
Baankubba diroho amaddino liqoote mixonsanni xibbuunni 5% Interpirayzoota liqiissitanno gede Biheeraawe Baanke hajajjannoha ikkirono Baankubba biddissu garinni Interpirayzootaho liqoote owaante uytannkkita egensiisino.
Biheeraawe Baanke fushshitino biddissi garinni Interpirayzootaho liqoo shiqishshannore jawaachinshanni shiqishshannokkire kayinni yanna agarre xa’mate rosichi nookkitano qummeesse; konni gedensaanni kayinni liqoo shiqishshinorenna shiqishshinokkire seekkine harunsate looso kaajjinshe loonsannita coyi’rino.
Baankootu Interpirayzootaho mittu mereershi furcho fante liqoote owaante aa noonsata Biheeraawe Baanke fushshitino biddissi noota kaysinohu kalaa Nigusu; konni ragaanni kalaqantino foonqe Ministere loosu mini Interpirayzoota liqote horaameeyye assitanno gede womaashshu uurrinshubba ledo qinaambe loonsannita xawisino.
Ministere loosu mini Interpirayzootu liqoo afi’ransanna hoogansa harunsitanno hayyo noota qummeesse; tini loosu hayyonna harunso qoqqowubbatenna quchummate gashshootubbara afantanno tantanubbarano suffannota huwachishino.
Ikkollana, xaano handaaru loossa agarroonninna mixote garinni ghattono isilanchimma noo garinni gumulantanni no yaate dandiinannikkita kulinohu Ministir Dieetichu; deerru deerrunkunni noo loossa kaajjado harunsonna qorqorsha hasidhannota lede huwachishino.
Amsaalu Felleqe
Bakkalcho Arfaasa 9, 2016 M.D
