Addis Ababa:- Sidaamu Qoqqowira dagate hasatto kaima assatenni hanafantino baadiyyete doogga ijaarsha amandoonni dirinni wo’munni wo’ma gumulate illachinshe loonsanni hee’noonnita Sidaamu Qoqqowi Pirezidaante Kalaa Desta Ledamo xawisi.
Pirezidaantichu babbaxxitino woraddara loosantanni noo baadiyyete doogga ijaarshi harinsho millise towaatinoha ikkanna; Shabbadiini, Wonshi, Gorchee, Arbegoonunna Bursi Woradda towaanyo assinoonniwaati.
Pirezidaantichu, towanyote gedensaanni coy’rino garinni, qoqqowu mootimma baadiyyete doogga iillo halashshatenni dagate horaameessimma buuxisiisate illachishshe loossanni afantanno yiino.
Qoqqowoho loosantanni nooti batinye baadiyyete doogga dagate hasatto kaima assitinota ikkase qummeessinohu pirezidaantichu, qoqqowu haaroo gede tantanami yannara daga balaxo uyte kaysidhino latishshu xa’mubba mereerinni doogo umite yiino.
Ikkinohurano sai Sasu dirira qoqqowoho loosantino doogote safote latishshi loossa qoqqowu mootimma lowo baajeette gaante loossinonna gumu leellinoteno yiino.
Konninnino worada woradu ledonna zoone qoqqowu ledo xaadisatennino sae, laalcho dikko fushshi’rate dandiissanno injo kalaqatenni miinju horaameessimma buuxisiisa dandiinoonnita coy’rino.
Qoqqowu daga hasatto kaima assatenni hanafantino baadiyyete doogga ijaarshano amandoonni dirinni wo’munni wo’ma gumulate illachinshe loonsanni hee’noonnita huwachishino.
Babbaxxitino woraddara loosantanni noo baadiyyete doogga ijaarshi loossa woyyitino isilaanchimmanninna jawaantenni loosantanni noo gede coy’rinohu Kalaa Desta; hawadi yanna iillasera albaanni gumulama dandiitanno gede hedatenni towaanyo assinoonnita xawisino.
Aananno dirinni hananfe qoqqowoho Shoolente zoonnara baadiyyete doogga distirikite tantanatenni baadiyyete doogga ba’ukkinni rahotenni gatamaratenni,annimma kalaqate loosi hasiisanno garinni gumulamanno gede qummeessino.
Sidaamu Qoqqowi hodhishshunna Doogote Latishshi Biiro Sooreessi Kalaa Taammiru Taaffehu isi widoonni; qoqqowoho hanafante gumulantinokkinna baajeettete dirinni haaruudde doogga ijaarshi, haroonshinna buussate ijaarshi loossa loosantanni noo gede xawisino.
Ijaarshu qoqqowu dooggate biilloonyinna baadiyyete iillote doogo ijaarshi pirojekitte(URAP)tenni loosamannoha ikkanna; qoqqowu mootimma 900 miliyoone ali baajeette gaante lowo illachinni loossanni no yiino.
Konninnino 1300 ali kiilomeetire baadiyyete doogganna 6 buussa ijaarshi ijaaramanni afamanno gede xawisino.
Baadiyyete doogga ijaarshi roorinni 5 ali woradda, woradunna zoonete mereershi ledo xaadisannoha ikkinota qaagiisse; biirote gede amandoonni baajeettete dirinni haaruudde doogga ijaarsha wo’munni wo’ma gumulate hasiissanno irkonna harunso assinanni hee’noommo yino.
Baajeettete dirinni 55 dooggate ijaarshanna 41 haaroonshu pirojekittubba loossanni noota xawisinohu qole qoqqowu dooggate biilloonyi aantichu loosu ha’risaanchi Kalaa Melkaamu Goowaniho.
Gaazeexu Odeessaanchinni
Bakkalcho Arfaasa 9, 2016 M.D
