Addis Ababa:- Katarunna cuu”attote ayyaani ga’labbote qarri nookkiha keerunni ayirrisame jeefamanno gede balaxote qixxaawo assinoonnita Sidaamu qoqqowi polisete komishiine komishinerchi Shimellis Toomaasihu xawisi.
Hawaasi Quchumira Baalante uurrinshuwaranna qara qara dooggara hobbaate agarsiisate Dijitaale kaameerra kaansoonnitano lede buuxisino.
Sidaamu qoqqowi polisete komishiine komishinerchi Shimellis Toomaasihu Itophiyu pireesete uurinsha ledo assino hasaawinni coyi’ranni; ayyaanu ledo amadaminohunni dagate hobbaate agaratenna ayyaanu keerunni ayirrisame jeefamanno gede dandiisate Federaalete uurrinshuwa, qoqqowu ga’labbote bissanna Ortodoksete amma’no massagaano ledo hasaawa assinoonni yiino.
Konninnino mootimma dagate hobbaate agartanno jaddo gargartanno; amma’note massagaano kayinni jaddo loossannore tiyyidhe giwanna reqeccisha noonsa yiino. Konni daafira baalunku halamme ga’labbo agarsiisate qeecha fula hasiissannota huwachishinno.
Komishiner Shimellisi ledotenni; jaddo tiyyidhe gibbanno annuwi noonte gede mite mite umonsa amma’note massagaanooti yitannori dagate mereero gaancenna canco kalaqqanno sokka sayissannori heeransa konni alba assinoonni harunsonni buuxate dandiinoonni yee; poletiku hedo finca amma’note ayyaani aana co’ontanni hoolloonnita ikkasenni; togoo assooti giddo millissannori amma’note massagaano eemarantanno gede qaagiissino.
Dagate keere agarsiisa polisete komishiinera uyinoonni yawonna biilloonye ikkasenni, canconna gaancete kakkayissannota hiittenne hedo finca hoolloonnita ikkase anfe qoropho assa hasiissannota lede huwachishinno.
Hawaasi quchumi keeru lawishshanna daa’’attote mereersha ikkasinni; ayyaana ayirrisate haammata daa’’ataano qoqqowo e’annota qummeessinohu komishiner Shimellisi; daanno wosina haa’rate addi addi qixxaawo assinoonni yiino.
Daallasu minnanna gangalatu basera waagu lexxo assinannikki gede hajo la’annonsa bissa ledo amaalloonnita egensiisino.
Qoqqowoho xaphoomunni 147 Taabooti fulannota kayisinohu komishinerchu; wole amma’no harunsaano taabootu galanno base co’eessate loosinni amadantinota qummeessino. Kunino amma’note taalleenyenna ayirrinye xawisannoho yiino.
Konninni ledote qoqqowu doogotenna hodhishshu biiro ledo halamatenni hala’ladda loossa gumullanni hee’noonniha ikkanna; ayyaanu yannara heedhanno luphiima dagate millimmo ledo amadaminohunni hodhishshu ruukkono ikko waagu lexxo kalaqantannokki gede polisete kaa’laano ikkitino teknolooje ledo qinaawatenni loonsanni hee’noonni yiino.
Jaddote assoote yannaasicho teknoloojenni irikisamme gargarate assinoonni wo’naalshinni Hawaasi quchumira qara qara dooggaranna baalante uurrnshuwara hobbaatu kaameera kaansoonni. Hattono 440 hallanyu uurrinshwuara hobbaatu kaameerra kaansoonnita kule; Konninnino mooru jaddo co’o assine huna hoongirono, ajishate dandiinoonnita komishinerchu lede buuxisino.
Qoqqowohono ikko hawaasi quchumira mootimma dagoomu hobbaatenna keere agarsiisate assitanno sharro irkisatenni daga ga’labbote loosi hale ikkitanno gede komishiner Shimellisi sokkasi sayisino.
Qiddist Gezzaheny
Bakkalcho Arfaasa 9, 2016 M.D
