Addis Ababa:- Wonci-Dendi Iko-Turizime Pirojekitete looso hananfe harancho yanna giddo isilanchimmatenni gumula dandiineemmota leellishshannote yaanni Xaphoomu Ministirch Abiy Ahimed (Dr) xawisi.
Xaphoomu Ministirch Abiy Ahimed (Dr) ‘’Hurbaate Gobbate’’ pirojekitubba biso ikkitino Wonci-Dendi IkoTuriziimete Pirojekite sa’u Qidaame faajjetenni maassiisino.
Xaphoomu Ministirch tenne yannara saysino sokkanni Wonci-Dendi IkoTurizimete Pirojekite harancho yanna giddo jawa looso loosa dandiinannita buuxisiissinonna ledamme loosunni leltinowa ikkinota coyi’rino.
Pirojekite babbaxxino gobbate qooxeessinni gamba assinoonni jiro, babbaxxino qooxeessinni daggino ogeeyyenninna pirojekitete qineessaanonni ijaarantinota ikkasenni ledamme loosunni leeltinowaati yiino.
Xaphoomu Ministirichi Abiy, Wonci qooxeessinni fultino haammata bareedda Itophiyu mittimma agarsiisate wolambinaate buuxisiisate jawa qeecha fultinota qummeessino.
Ledamme mittimma amadamme lopha ikkitino gede huwachise; Itophiyu Jireenya buuxisiisate qarate yiino.
Pirojekite Woncinna qooxeessa latishshunni xaadisate dandiissitannotano xawisino.
Wonci-Dendi Iko-Turizimete pirojekite addi addi safote latishshubba hanqaffinota ikkitinohura dureeyye aantete loossanno loosira injiino akata kalaqqinota Xaphoomu ministirch Abiy (Dr) lede qummeessino.
Tini pirojekite hanafote looso ikkitino gede xawisinohu Xaphoomu ministirch; aantete jawu loosi agarannonke yaanni coyi’rino.
Aantete Ambo, Wonci-Dendi Garbanna Woliso mitteenni amadisiisanno looso loosa hasiissannota xawisino.
Dureeyye Wonci-Dendi qooxeessira hala’ladunni Investimentete bobbakkanno gede qoqqowu mootimma illachishshe loossara hasiissannota xawisinohu Xaphoomu ministirch; Wonci qooxeessi dagoomi qooxeessu kalaqama agare keeshshiishino gede xaano konne assootesi kaajjishe sufanno gede sokkasi saysino.
Budisenni wosincho adhitanno Wonci-Dendi daga daa”attara dagganno wosinna danchu akatinni haa’ratenni su’mase agarsiisidhe sufa noose gede qummeessino.
Ledeno, Daa”ataano danchu garinni owaante afidhe hagiirrunni higganno assate woyyitino eo abbisiisanno doogo qineessa heedhannonsa yiino.
Kalaqamunni baraa’noommo jiro aana kaajjine loosatenni Jireenyanke buuxisiisa hasiissannonke yiinohu Abiy Ahimed (Dr); hanafantino Jireenyu doogo gumulatenni uurrisannonkeri dino yiino.
Aanteteno gobbankera babbaxxitino latishshu loossa harancho yanna giddo gumulate jawaanteemmo yaanni coyi’rino.
Oromiyu Qoqqowi Pirezidaantichi Shimellis Abidiisa isi widoonni; Wonci-Dendi Iko- Turizimete qachi daa’’attote mereersha calla ikkikkinni haammata kaayyo waalchooti yiino.
Pirojekite eo burqisatenni, loosu kaayyo kalaqatenni hattono loosu kalaqo jawaachishatenni miinju lophora jawa qeecha fultanno gede pirezidaantichu Shimellis coy’rino.
Xaphoomu ministirchi gobbaanni Afiriku Mittimma Komishiine Murrichi Musa Faaki Mahimaat, IGAD Murrichi Worqineh Gebeyyehu (Dr) na woloottuno dipiloomaatete gaamo miilla hattono Federaaletenna qoqqowubbate luphiima loosu massagaano maassote amuraati aana leeltino.
Wonci-Dendi Iko-Turizimete qacci Xaphoomu ministirch Abiy Ahimed (Dr) “Hurbaate Gobbate” amuraatinni ijaarantino baychubba mereerinni Sayikkiha ikkinota Xaphoomu ministirch borro mini mashalaqqe leellishshanno.
Wonci-Dendi Iko-Turizimete qacce latisate harinsho ijaarshu gufo 8 kuminni 12 kumi geeshsha ikkitanno qansootira loosu kaayyo kalaqinoha ikkanna konninni jawu safote latishshi loosamino.
Kuri mereerinnino 43km doogo, 35km doogote korreentenna wolqate shiqo, 72km buusanna rosu minna kullannireeti. Qarqaru wedelli jajjabba latishshu loossa loosatenni daanno miinju horaameessimma coommishi’ra hanaffino. Hala’lado qooxeessu dagano xaa yannara roorenkanni horaameessimmate kaayyo afi’ransa Xaphoomu ministirch Abiy Ahimed (Dr) tuqu xaadi qoolisira xallasi qaangannite.
Addisu Adoola
Bakkalcho Arfaasa 9, 2016 M.D
