Addis Ababa:- Sidaamu qoqqowira amandoonni baajeettete dirinni sa’u onte agannara loosu kaayyo kalanqoonninsari 20 kume ale ikkitanno qansootira loosu kaayyo kaalnqoonnita Qoqqowu loosu, dandootenna interpirayizootu latishshi biiro egensiissu.
Kuri mereerinni 3 kume ale ikkitannori digiretenni maassante fultinore ikkansano xawinsoonni.
Qoqqowu Loosu Dandootenna Interpirayizootu Latishshi Biiro layinkinna, loosu kaayyo kalaqo handaari sooreessi kalaa Keffiyaalew Kebbede Itophiyu pireesete uurrinshara xawisino garinni; qoqqowoho 2014M.D hanafe jajjabba rosu uurrinshuwanni maassante fultanno wedellira babbaxxitino handaarranni loosu kaayyo kalanqanni hee’noonni.
Konni kaiminni, 2015M.D qoqqowoho 52 kumi wedellira loosu kaayyo kalaqate mixi’ne gumulloonni yiinohu kalaa Keffiyaalew; hiikkonne doorshano wedellaho yaanno adawarshinni handaaraho illacha tunge loonsanni hee’noonnita egensiisino.
Tayxe dirinnino, sa’u onte agannara wedellaho loosu kaayyo kalaqate amandonni mixo xibbuunni 93% gumula dandiinoonnita coyi’rino.
Sai dirira babbaxxitino loosu handaarranni bobbakkinorira 20 miliyoone birra doychote fendenni gaamme hattono albaanni liqiissinoonniha qolsiisatenni xaphoomunni 155 miliyoone birra liqootenni tuqinsoonni.
Konni dirinnino, 100 miliyoone birra liqoote shiqishate mixi’noonnihu xaa geeshsha 30 miliyoone birra woraddatenna quchummate gashshoottara tantanante loosidhanni noorira liqiissinoonnita kulino.
Liqoo qolsiisate ragaannino sa’u onte dirrara 35.4 miliyoone birra qolsiinsoonni.
Konni dirinni babbxxitino Interpirayzoota millia ssitannori 42 kume wedellira irko assate hendeenna xaa geeshsha 7 kume ikkitannorira irko assinoonni yiino.
Wedellaho qarunni sase handaarranni loosu kaayyo kalanqanni yiinohu kalaa Keffiyaalew; sa’u onte agannara horaameeyye ikkitinori mereerinni 40% gibrinnunni, 35% Industiretenni hattono 25% owaantete handaarinni loosu kaayyo kalanqoonnita qummeessino.
Kalaa Keffiyaalew xawishshi garinni; 2014M.D hanafe loosu kaayyo kalanqoonninsari mereerinni 9 kume ale ikkitannori digiretenni maassante fultinoreeti.
Tayxe dirinnino xaa geeshsha loosu kaayyo kalanqoonninsari 20 kume ali wedelli mereerinni 3 kume ikkitannori digiretenni hattono 8 kume ale ikkitannori dipiloomunni maassante fultinore ikkansa lede xawisino.
Amsaalu Felleqe
Bakkalcho Arfaasa 2, 2016 M.D
