Addis Ababa:- Qansootu hobbaatenna horo agarsiisatenni yannite hayyo horoonsi’ne gobbaydi loosu kaayyora bobbakkanno gede assinanni hee’noonnita Loosunna Ogimmate Ministere egensiissu.
Loosunna Dandoote Ministere IFDR Mootimmate xaadooshshi owaante ledo halamatenni qixxeessitinoha gummaamo xaadoshshe loosu kaayyo kalaqora, ogimmate latishshiranna keeraabbino Industerete xaadooshshira yaanno massagote qaalinni babbaxxitino tuqu xaadooshshuwa sooreeyye ledo Ministerete gambooshshu harira hasaawu bare harinsoonni.
IFDR Loosunna Dandoote ministercho dukko Muferiyat Kaamil tenne yannara coyidhanni; qansootaho loosu kaayyo kalaqate handaari loossa baalunku qansooti beeqqonna halamme hattono akatoomu soorro abba xa’mitannohura hala’lado miidiyunna xaadooshshu millimillo kalanqe loosa hasiissanno yitino.
Handaaru loossa raagaanni dandoo qansootu heddanno doogo ikkanna kalanqeemmo loosi kayinni mittu mittunku qansichiha hidhate dhuka lossannoha hattono keeraabbino Industire hala’litanno qooxeessa kalaqate dandiisiisannoha ikkasinni handaaru loossa hala’lado miidiyu millimmonna huwanyoote kalaqa agarrannita xawissino.
Tini hee’noommo yanna kaayyono shettono afidhinote yitinoti Ministircho; ilama kaayyo halashshite la’annonna horaameeyye ikkitanno gede miidiyubba ille fanate qeechansa fula noonsata huwachishshsino.
Qansootu gobbaydi loosu kaayyora bobbakkanno gede assate dandiisiissannota yannitte hayyonni irkinse hobbaatinsa agaramino garinni loosu aana keeshshitanno gede assate hajo la’annonsa bissanni ledo qinaambe loonsanni hee’noonnitano qummeessitino.
Sai dirira 127 kume ale qansoota gobbaydi loosu kaayyora bobbaasate dandiinoonniha ikkanna; qansoota woyyaawino garinni horaameeyye assate tayxe dirinnino sa’u onte agannara 144 kume 825 qansoota gobbaydi loosu kaayyora bobbansoonnita coyidhino.
Konninni, Mereerimu Soojjaatinni qansootansa gobbaydi loosu kaayyora bobbaassannori 14 gobbuwanni gobbanke 2ki deerra amadde afantannota Ministircho ledde xawissino.
Amadisiisseno, handaaru loossa qansootunniha loosu bude lossate akatoomu soorro abba xa’mannoha ikkasinni hala’lado miidiyubbatenna xaadooshshu looso hasiisanno yitino.
Mootimmate xaadooshshi owaante minister Dieetichi Kebbede Desiisa isi widoonni; loosu kaayyo kalaqo handaari loossa gobbate miinju hiiqqamme sissitannonna qansoota buximatenni fushshitannota ikkasenni miidiyubba loosu budi lophanno gede assate qeechinsa luphiimaho yiino.
Amsaalu Felleqe
Bakkalcho Arfaasa 2, 2016 M.D
