Addis Ababa:- Amandoonnihu 2016 haanju harumi loossanni 300 miliyoone chigginye kaasate qixxeessinanni hee’noonnita Sidaamu Qoqqowi Irshunna Kalaqami Jiro Latishshi Biiro egensiissu.
Biirote Layinki sooreessinna kalaqamu jironna baattote gashshooti handaari sooreessi kalaa Fiqreyesuus Ashshennaafi Itophiyu pireesete uurrinshara xawisino garinni; qoqqowoho 2016 haanju harumi loossanni 300 miliyoone chigginye kaasate qixxaawo assinanni hee’noonni.
Sooreessu xawishshi garinni; kaansanni chigginyuwa giddonni 180 miliyoone badheessu yannara hattono gattinota 120 miliyoone hawadi yannara kaansanni.
Chigginye qixxeessinanni hee’noonnihu Irshunna kalaqamu jiro Biironna Qooxeessu agarooshshinna Dubbu latishshi biilloonyi widoonni ikkanna; sagalimmate ikkitanno laalo chigginyera addi illacha tungoonnitano qummeessino.
Dubbu latishshira 119 miliyoone, laalonnita 5 miliyoone, Leemma 14 miliyoone, Biinfilleho ikkitannota 5 miliyoone hattono Saadate sagalimmara hossannota 11 miliyoone chigginye qixxeessate mixi’noonniha ikkanna; xaa geeshsha 126 miliyoone ikkitannota qixxeessinoonni yiino.
Chigginye 20 kume 500 hekitaare Dubbu latishshira 8 kume 500 hekitaare kayinni Irshu giddo kaasate xaphoomunni 29 kume hekitaare baatto aana kaasate qixxaawo assinoonnita kalaa Fiqreyesuusi xawisino.
Kaansanni chigginye Dubbu latishhsira, laalotenna duuchu handaari horo afidhinota ikkitanna 302 chigginyete mereershuwara qixxeessinanni hee’noonnitano hattonni.
Sai dirira kaansoonni chigginyuwa giddonni xibbuunni 85% ikkitannoti lattinota qummeesse; dagoomuno kaashshu yannara leellishino kakkaooshshinna beeqqo hattono chigginyuwa agarroonni garinni latteenna agarroonni gumi maareekkamanno gede awuutate loosono jawaachishe sufisa noonsa yiino.
Haanju harumi loossanni gobboomu deerrinni afi’noonni horo agarsiinse sufisa hasiissannota xawise; Diilallote akati soorro kalaqqanno xiiwo dandaatenna dubbu latishsha halashshate loosira baalunku qansooti halamme hasiissannotano huwachishino.
Tayxe haanju harumi loossanni qoqqowoho 2 miliyoone ale daga beeqqaano ikkitannotano kalaa Fiqreyesuusi lede qummeessino.
Amsaalu Felleqe
Bakkalcho Arfaasa 2, 2016 M.D
