Addis Ababa:- Techonni hanafe harinsanniti dipilomaasete lamala Addis Ababu quchuma dipilomaasete mereershimmasi hegersate jawa dhuka ikkannota Gobbaydi hajo ministere egensiissu.
Gobbaydi hajo minstere qaalu saysaanchi Ambaasaadder Mellese Alem (Dr) dipilomaasete lamala lainohuni odeessaanote xawishsha uyno.
Ministerete qaalu saysaanchi xawisino garinni; Itophiyunnita gobboomitte horo ayirrisiisate dipilomaasete handaarinni baalanti dagoomu bissa beeqqo buuxisiisa hasiissanno. Konne assateno, Gobbaydi hajo ministere; ‘’Dipilomaasenke gobboomitte horonkera; Afriku qaru quchuminni kalqete geeshsha’’ yaanno adawarshinni techo barrinni faajjetenni fannanni.
Techonni hanafe fannanniti dipilomaasete lamala Addis Ababa dipilomaasete mereershimmasi hegersate jawa dhuka ikkannota Ambaasaadderichu xawisino.
Itophiyu dipilomaase seeda dirrara keeshshitinohanna mootimmate beeqqonni calla ikkikkinni qansootu hixamanyinna wo’naalshinni hegertinote. Qansootunna uurrinshuwa gobbansa Ambaasaadderootaati yiino.
Lawishshaho, Atileetootu, Itophiyu Diilallote doogonna wolootta uurrinshuwa xawisa dandiinanni yiinohu qaalu saysaanchi; duucha hanqaffino dipilomaasete millimillo hanafantanno gede tini dipilomaasete lamala jawa tiro afidhinota kaysino.
Gobboomitte horo buuxisiisate ragaanni Gobbaydi hajo ministere soorrantanni noo kalqe giddo soorrantinoti loossate hayyubba heedhannose gede loonsanni hee’noonnita kulino. Baxxinohunni, Addis Ababunniha dipilomaasete mereershimnmasi hegersate ragaanni techo fannanniti dipilomaasete lamala jawa tiro afidhino. Addis Ababu kalqenkera afantanno sase qara qara dipilomaasete mereershuwanni umikkita ikkae Ambaasaadder Mellese Alem xawisino.
Addis Ababu dipilomaasete mereershimma duucha dipilomaasete eaafulonni agarante keeshshitino yiinohu qaalu saysaanchi; mite mite bissa quchuminkehu dipilomaasete mereershimma heedhannokki gede wo’naaltino.
Quchumunnita dipilomaasete mereershimma halchotenni hegersinannita dikkitino. Kalqoomu uurrinshuwa heedhannowa assine hegersate hajo hasatto calla ikkitukkinni kaajjado looso xa’manno yee; konnira, baalunku dagoomi beeqqo qara hajo ikkitinota coyi’rino. Itophiyu xaa yannara babbaxxitino gobbuwa ledo noose xaadooshshe roorenkanni kaajjishate hixamanyite loossanni afantannota qaalu saysaanchi lede xawisino.
Amsaalu Felleqe
Bakkalcho Arfaasa 2, 2016 M.D
