Addis Ababa:- Itophiyu Seeda dirrara assitino dipiloomaasete millimillo umisenni sa“e Afriku dagara, saeno kolidda dagara luphiima kaa`lo assitinota Kalaa Demmeqe Mekkonnin xawisi.
Kalaa Demmeqe Mekkonnin Itophiyu pireesete uurrinsha ledo assino keeshshonni yiino garinni; kadote gashshooti sanira Itophiyu challicho kolidda daga riqiwaancho ikkite “League of Nations” beeqqitino. Kunino Itophiyu dipiloomaase umisenni sa“e Afriku dagaranna woloottahono kolidda dagara jawa kaa`lo assitinota leellishannoho.
Albi sanira tophiyu addi addi doogonni gobbayidi xaadooshshe harissanni keeshshitinota qaagiisse; 116 dirira albaanni gobbayidi hajo ministere uurrinse looso uurrinshunniha assinoonnita xawisino.
Techo barrinni fannanniti “dipiloomaasete lamala” sa`u dirra dipiloomaasete harinshonkenni noo mitiimmubba la”a, xaa yannara dipiloomaasete handaarinni noo kaayyubbanna jiffa bada yitanno illachubba amande harinsannita qummeesse; sa`u dirrata rosichubbanna yannate akatubba huwatatenni aantetenni dagoomittete horonke agarsiinse sayisate maa assa hasiissanno yitannota la”ate hattono daanno sane dipiloomaase maa lawa noosero illaallinsannita ikkitanno gede buuxisino.
Konninnino dhagge, yannate akatubbanna dagganno yanna xaadisatenni kaajjado dipiloomaasete dhuka gatamarate dandiisannota kule; baalunku qansichi dipiloomaasete loossanni beeqqanno gedenna hajo dagate ajanda ikkitanno gede gobboomu millimmo kalaqate dipiloomaasete lamala diru dirunni suffannota xawisino.
Soorro harunse baca handaarra aana rifoormete loossa loosantino yiinohu kalaa Demmeqe; Itophiyu gobbayidi hajo xaadooshshi poolise hanqafono dagoomittete horonke agarsiisanna bayirroonyenke ayirrisiisa dandiisanno garinni rifoorme assinoonni yiino.
Konninnino gobbayidi xaadooshshinke balaxotenni miinju dipiloomaase aana illachishinoha ikkanno gede loossa loosantino yiinohu layinki xaphoomu ministirchi; duucha daganna lamooshshu xaadooshshi aana illachishino, poletiku hanqafo aana mereersha assitino dipiloomaase hattono qansichu aana illachishshino dipiloomaase mitte jawa hanqafo gede assite amaddino gobbayidi hajo xaadooshshi dipiloomasete qara qara illachu handaarra ikkansa coyi`rino.
Abbebech Maatewoos
Bakkalcho Arfaasa 2, 2016 M.D
