-Araarso Gerremew (Dr) Borreessino “Affini” Maxaafi sa’u Qidaame barra maassamino
Addis Ababa:- Sidaamu daga bire hundinni adhite daggino ha’nura budu amanyootubba noonsa dagaati. Kuri giddonni mittu ‘’Affini’’ araarunna gaance tirranni amanyooteeti.
Gobbanke Itophiyu haammata ikkino ha’nura bude, balchooma, ammanno, dhaggenna labbino jiro nooseha ikkanna; duuchu dagoomi mittimmatenni, halantenna baxante roduuwimmatenni mimmitu ledo sumuu yite heedhanno jirte noonsa.
Kuri mittimmatenna roduuwimmatenni hallanyunni, maatetenni hattono gaamotenna dagoomu giddo sumimmete hoonge budunni haasaambe gaance tiratenna araara karatenni keere dirrinsanniti ha’nura budu egennonna amanyootubba noonsa daga afidhino gobbaati Itophiyu.
Kuri ha’nura budu amanyootubba mereerinni Sidaamu daga araarunna gaance tirrannihu ‘’Affini’’ amanyooti kullanniho.
Konne Sidaamu daga bire hundinni adhite ilamate tareessitanni dagginoha naaxxisannoha araarunna gaance tirranni budu amanyoote seekke leellishanno garinni Araarso Gerremew (Dr) borreessinoha ‘’Affini’’ maxaafa sa’u Qidaame Addis Ababaho Ilille Hoteelara maassiinsoonni.
Maassote amanyooti aana leelle hasaawa assinohu Sidaamu Qoqqowi Woga, Turizimenna Ispoortete Biiro Layinki Sooreessinna Turizimete handaari sooreessi kalaa Abbebe Maarimo coyi’ranni; albi annuwanke hundinni adhite dagginohu uminsaha ikkino muxxe budu hornyubba no.
Kalaa Abbebe xawishshi garinni; ‘’Affini’’ ha’nura bude rosoho, keereho, farcote, gaance tirate hattono babbaxxitino poolise qixxeessate ragaanni waacote gede horoonsi’nanni doogga qixxeessinanni hee’noonnita kulino.
Konni kaiminni, Sidaamu dagaha araarunna gaance tirranniha ‘’Affini’’ amanyoote budu hornyasi agarino garinni xiinxallo assine gobboomu deerrinni amaalammetenna araaraho hattono gaancubba tiratenna saeno kalqete Halantino Mootimmuwa Rosu Sayinsetenna Budu Uurrinsha (UNESCO) kalqoomu amammandannikki dona assine maareekkisiisate balaxote loossa loonsanni hee’noonnitano kalaa Abbebe Maarimo baxxinohunni Itophiyu pireesete uurrinshara xawisino.
Araarso Gerremew (Dr) borreessino Affini Maxaafi Sidaamu dagaha ha’nura bude amade qixxaawasai lowontanni jawaachinshanniho yiinohu kalaa Abbebe; muli barrubba gedensaannino ‘’Affini’’ yaamantannota Affini budu jirte leellishshannota Sidaamu Afiinni umikki yannara qixxaabbino filme maassiinsannita qummeessino.
Konni albaanni onte babbaxxitino hajubba amaddino maxaaffa borreessinohunna xa kayinni ‘’Affini’’ yaamamannoha 6ki maxaafasi borreesse nabbawaanote shiqishinohu Araarso Gerremew (Dr) tenne yannara coyi’ranni; maxaafu ha’nuranna naaxxisannoha Sidaamu daga araarunna gaance tirranniha Affini budu amanyoote Sidaamunnino sae gobboomunna Afrikunniha hattono kalqenniha ikkanno gede egensiisate hendeenna qixxaawinoha ikkasi kulino.
Affini budu amanyooti xaa yannara hee’noommo gobboomu akatinni xaaddinonke qarrubba tirate mitticho doogo gede assine horoonsi’ra dandiinanniha ikkasino ammanannota maxaafu borreessaanchi Araarso (Dr) lede coyi’rino.
‘’Affini’’ budu amanyooti Sidaamu daga seeda sannara horoonsidhanni dagginohanna gaance tirranni bude ikkasinni koo/tee, diro, dagoomitte heeshsho deerra bandikkinni baalanta dagoomu bissa hanqafino garinni horo aannoha ikkasi Mekbib Xaasew (Dr) lede qummeessino.
Maxaafu, Sidaamu daga ha’nura budese amadde hiittoonni horoonsidhanni dagginoronna qarrubba badde qarrubbate malanna tiro ikkannore wortanni hadhanno hayyo xawise leellishannoha ikkasino Mootimmate woshshamaanchu ministirchi kaa’laanchu pirofeeserchi Mihiretu Shaanqo tenne yannara coyi’rino.
Maxaafu maasso aana leelte hasaawa assitinori fullahaanonna mootimmate loosu massagaano; ‘’Affini’’ ha’nura budu amanyoote hornyasi agarre gobboomu keerira horoonsi’ra hasiissannota kulte; kuni araarunna gaance tirrannihu ha’nuru budi Sidaamu daga Itophiyaho uytino jawanna naaxxissanno jirte ikkasi coyidhino.
Maassote amanyooti aana, fullahaano, luphiima Federaaletenna qoqqowu hattono deerru deerrunkunni afantanno mootimmate loosu massagaano, Artistootu, dipilomaatenna ayirrado woshshatto assinoonninsa wosinna leeltino.
Amsaalu Felleqe
Bakkalcho Sadaasa 25, 2016 M.D
