Itophiyu Somaali Laandenni Baaru furcho afi’rate malaatissino sumiimme, Itophiyunnita dhaggete hiiqqamme sissitinotanna latatenna gobbate wolambinati keeraanchimmara buusa ikkase Sidaamu qoqqowi Hawaasi quchumi teesaano xawissu.
Itophiyu Baaru furcho afi’rate sumiimme Somaali laandenni ledo malaatisase harunsite Hawaasi quchumi teesaano hagiirrensa xawissino.
Teessaano Itophiyu pireesete uurrinshara xawissino garinni; Somaali laandenni ledo assinoonni Baaru furcho afi’rate sumiimme furcho gatamadhatenna Duumu baarira meessinke furcho heedheennanke lanteemmo gedenna gobbate wolaminatenke buuxisannoho yitino.
Hedonsa uyitinori mereerinni Kalaa Habtaamu Taaddelehu mittoho. Isino, “Baaru furcho hee’ra hoogasenni seedu dirira jawa waaga baantoommo. Xa kaayinni tini kaayyo dhaggennitenna latishshinkera kaimaho” yaanni xawisino.
Baaru furcho afi’rate hajo ka’a duuchanka baqqi assitinotenna kageeshsha hoonge keeshshanke gaabbissinonke yiinohu kalaa Habtaamu; tini kaayyo duuchanka hagiirsiissinote yiino.
Halaale coyi’rate yaanno Kalaa Habtaamu, halaale coyi’rate Baaru furcho afi’ra gobbate horooti; hattono miinjunna poletiku hettisamaanchimmanke naqqassinnote” yiino.
Wolu hedosi uyinohu Kalaa Geetaachew Muniibi, “Somaali Laandinna Itophiyu Baaru furcho aana assitino sumiimme addintanni seedu diri xa’mo dawartinote;konniraati anera dhaggennitanna maala’lissannota ikkitinoehu. Baaru furcho afi’ranke gobbate daddalu injo ollohissanote; kunino Itophiya shiima yanna giddo lophote guunxora iillishannoha ikkasi qummeessanno” yaanni xawisino.
“Baaru furcho afi’rate hajo polotiku hajo dikkitino;gobboomu hajooti” yiinohu kalaa Geetaachew; baalunkunni haja’yaati yee irkisanna kaa’lama hasiissanno yaanni guwursino. Tini hajo tolturo tini ilama dhaggete biso ikkite borreessantannotano hattonni.
Somaali Laande tenne lamala giddo Baaru furcho hajo aana assitino sumiimme tittirshu amadonna loosu aana hosiisate mittu agani giddo jeefantannotano Ambaasaadder Reeduwaan Huseeni xawisinoti qaangannite.
Yaareed Geetaachew
Bakkalcho Sadaasa 25, 2016 M.D
