Gibrinnu ministere gibrinnu reekko inistituute ledo halamatenni base basente nooha diilallote akata hedote giddo worino gibrinna loossanni afantannota gibrinnu ministere egensiissu. Konne looso gumulsateno qoqqowubbate gibrinnunna diilallote akati aana towanyo assinanni hee’noonnita ministere xawissino.
Itophiyu pireesete uurrinsha ledo hasaawa assinohu gibrinnu ministirchi dokter Girmi Amentehu coyi’ranni; aantino yannara shiima baatto aaninni afi’nanni laalchi bikka ledate qooxeessu diilallote akati ledo sumuu yaanno gibrinna loosa hasiissannota buuxisino.
Konne gumulsate dandiisanno gede gibrinnu ministerenna gibrinnu reekko inistituute ledo qinaawatenni baalante qoqqowubbara gibrinnu reekko hayyo qixxeessinanni hee’noonnita xawisino.
Qoqqowubbate gibrinnu reekko hayyo kalaqannihu qaru illachi “hiikko qooxeessira maricho laashsha hasiissanno?” yaannoha ikkasi qummeessinohu ministirchu; konninni harunsine konni alba Gaambeellu, Somaaletenna Affaarete qoqqowubbara towanyo assinoonniha ikkanna muli barrinnino Sidaamunna woloottu qoqqowubbarano loonsanni hee’noonnita coyi’rino.
“Baalante qarqartora mittu dani looso loosa dihasiissanno” yaannohu ministirchu Dokter Girmi Amentehu; budillaancho gibrinnu hayyonni yannaasincho hayyowa reekkamanna woyyaawino sircho horonsi’ra hasiissannota kayise, qaddo ikkitanno qoqqowubbanni rosicho adha hasiissannota huwachishinno. Tenne widoonni Sidaamu qoqqowira noo rosicho woloottu adha hasiissannota kulino.
Kunino shiima baatto aana lowo laalcho laashshatenna qinaawino gibrinna loosa hasiissanno yee, Sidaamu qoqqowiranna Gedeote noo baatto injiitinota ikkase kulanno. Korkaatuno tini qooxeessubba baattote agaroosshe calla ikkikkinni bushshu asiidaa’manni gawajjantino qooxeessubba ikkansanni laalcho uyitannokki daafira loosidhe galtino daga Baarzaafe calla kaasse Ontu dirinni mitte higge haqqa murte hirate widira e’ino yanna noonkanni.
Ikkollana qinaawino Gibrinna yitanno hayyo harunsatenni xaa yannara Baarzaafete baatto Abukaadote laalchira soorritino harinsho noota kayisinohu ministirchu; konninnino dagate horonsiraanchimma woyyaabbinota la’’ate dandiinoonni yino.
Gibrinnu loosinke tenne hayyo mereersinoha ikka hasiissanno yinohu ministirchu; gibrinnu tantanonni agarrannihu shiima baatto aana lowo laalcho afi’rate dandiissanno teknolooje shiqisha ikkanna, hiikko qooxeessira hiitto laalcho laashsha hasiissanno yaannohano buuxa hasiissannota huwachishanno.
Qiddist Gezzaheny
Bakkalcho Sadaasa 25, 2016 M.D
