Addis Ababa:- Hurbaate gobbate piroekte biso ikkitino Wonci Dendi Iko-turizimete pirojektenni deerransa agadhitino Loojja, jajjabba minnanna gonxanni minna ijaaramansa Pirojektete qineessaanchi kalaa Daaba Jinfeessa xawisino.
Pirojekte Sadaasa muli barrubba giddo faajjetenni maassante owaante aa hanaffannota kulloonni.
Kalaa Daaba Jinfeessa Itophiyu pireesete uurrinshara xawisanni; ‘’Hurbaate gobbate’’ pirojekte biso ikkitino Wonci Dendi Iko-Turizimete pirojekte Wonci garbi ledo dhaaddotenni xaadissanno doogo, Atileetootu seeda xeertinye doddanno Tiraake, Kaafteeriya lendanna budu sagalete minnanna Garbu qaccera addi addi gangalatu base ijaarantino.
Pirojektete ledo babbaxxitinori safote latishshuwanna ijaarshuwa loosamansa egensiise; Wonci Denda Iko-turizimete pirojektuwa deerransa agadhitino Loojjanna daa’’ataano haa’ra dandiisiissannori jajjabba minna maassantannota xawisino.
Pirojekte hurbaate gobbate pirojekte biso ikkitinotanna lamu diri albaanni hananfoonnita ikkase kayisannohu qineessaanchu; Wonci Dendi Iko- Turizimete pirojekte muli barrubba giddo maassantannota xawisino.
Barraho ijaarshu jeefaminohu Wonci e’nanni waalchi maassamannota xawisinohu kalaa Daaba; injiinonna ille goshooshanno garinni loosaminoha ikkasinni 200 ali kaameella haa’ra dandiitanno base afidhinota xawisino.
Wonci e’nanni waalcho addi addi owaante aanno gede assine loonsoonnitanna baankuwanna Oromiyu qoqqowira afantannore daa’’attote base leellishshanno amado amaddinota coyi’rino.
Pirojekte qooxeessaho afantanno 560 qansootira loosu kaayyo kalaqate dandiissannota ikkase xawisinohu qineessaanchu; baxxinohunni, wedelllu boohaarrete owaantera ikkitanno Farado shiqishatenni, sagale raisatenni addi addi boohaarshu owaante loossanni e’’o afi’ratenni heeshshonsa soorridhanno gede kaayyo kalaqqannota xawisino.
Wonci Dendi Iko-Turizimete pirojekte dagate halammenni loosantinota ikkasenni; qooxeessu daga horonsi’raano assitannota ikkase qummeesse; dagoomu base martanno wosinna haadhe garunni wosinsidhannota ikkase coyi’rino.
Qiddist Gezzaheny
Bakkalcho Sadaasa 18, 2016 M.D
