Addis Ababa:- Gobboomu amaalamme gumulamara tuqu xaadooshshuwanna gobboomu amaalammete komishiine gutu mixo fushshite loosa hasiissannonsata Dagate riqiwamaano amaale mini songaafichi kalaa Taaggese Caafo huwachishi.
Gobboomu amaalammete komishiine Amaarunna Tigirayete qoqqowubbara beeqqaano fila hanafa hasiissannonsata xawisino.
Dagate riqiwamaano amaale mini dimokraasete hajubba uurrinshu komite gobboomu amaalamme komishiine jeefishshi aana assitino towaanyo ripoorte aana hasaawa assinoonni.
Tenne yannara songaafichu kalaa Taaggese Caafo xawisanni; dagoomunniwa hasi’nanni bikkinni amaalammete daafira huwanyoote kalaqate tuqu xaadooshshuwanna komishiine gutu mixo fushshite loosa hasiissannonsa.
Gobboomu amaalamme gummaame assa dandiinannihu amaalammete illacha dagate egensiisa dandiinirooti yiinohu songaafichu; konnira tuqu xaadooshshuwa qeechi luphiimaho yino.
Amaalamme gummaame ikka dandiitanno akati aana, balaxo aa hasiissanno hajubbanna dagoomaho huwanyoote kalaqate hattono wole hajubba aana tuqu xaadooshshuwanna komishiine tittirote mixo fushshite loosa hasiissannota xawisino.
Gobboomu amaalamme wo’ma assate baalanti dagoomu bissa riqibbanno bissa olluubbate geeshsha dirrine beeqqisiisa hasiissanno yiinohu songaafichu; Tigirayetenna Amaaru qoqqowubbara beeqqaano filatenna woloota loossa rahotenni hanafa hasiissannonsata huwachishinno.
Xaa yannara Tigirayete qoqqowira noohu keeru akati woyyaawinoha ikkasinni hajo la’annonsa bissa darga marte beeqqaano badatenni hanaffe wolootta loossa loosa hasiissannonsa.
Amaaru qoqqowira massagaanote ledo addi addi hajubba aana hasaawa assinoommo yiinohu songaafichu; qoqqowoho beeqqaano filatenna woloota loossa hanafate injiino qooxeessa badatenni ranke loosu giddora e’’a hasiissanno yino.
Qoqqowoho noo keere horonsi’ne injiitino basera loosa dandiinanni hajubba injeessa hasiissannotano qummeessino.
Gobboomu amaalammete komishiine qaru komishinerchi Pirofeeser Mesfin Ar’ayahu isi widoonni; uurrinshu komitenni assinoonniha beeqqaano badate, miidiyubba hattono woloota loossa waacote gede adhine horonsi’neemmo yee; babbaxxitino gobbate qarqartora assinanniti amaalammete harinsho gobbate qara hajubba aana gutu sumimme kalaqatenni woyyaabbinotanna dimokiraasete amanyooti hala’lino Itophiya kalaqate injoo kalaqqannota huwachishinno.
Komishiine tungoonniseta dhaggetenna gobboomu yawo fulate addi addi dagoomu bissa riqibbannore woraddate afantannore 50 beeqqaano fillanni afantannota egensiisino.
Itophiyu Pireesete Uurrinshahu qaru loosu gumulsiisaanchi kalaa Mesaafint Tafarrihu isi widoonni; gobboomu amaalammete harinsho gummaame ikkitanno gede tuqu xaadooshshuwa mashalaqqe dagoomaho yannatenna garunni iillishate yawo noonsa.
Itophiyu pireesete uurrinsha miidiyu gede tungoonniseta dhaggetenna mootimmate yawo fulatenni amaalammetenni afi’nanni horo dagoomaho huwachishanna hajo la’annonsa bissa irko assitanno gede loossanno yaanni coyi’rino.
Gobboomu amaalamme lainohunni babbaxxitino mashalaqqe dagoomaho iillishate komishiinete loosu mini ledo gutu mixo fushsha hasiissannota xawisino.
Pireesete gede dhagge borreessine amadate yawo noonkeha ikkasinni gobboomu amaalamme aana ilama rosiisa dandaanno looso loonseemmo yiino.
Uurrinshu komite Addis Ababaho, Sidaamu, Harerinna Beenishaangul Gumuzi qoqqowubbaranna komishiinete qara loosu mine afamatenni amaalammete komishiine loosonna harinsho noo deerra towaattinota ripoortetenni xawinsoonni.
Qiddist Gezzaheny
Bakkalcho Sadaasa 18, 2016 M.D
