Addis Ababa:- Xaphoomu ministirchi Abiy Ahimed (D.r) woshshatto harunsite Turizimete ministircho Ambaasaadder Naasiise Caali bero uyitino xawishshinni; Xaphoomu ministirchi gobbaydi gobbuwara heedhanno layinki Itophiyu ilamara shiqishino woshshatto maatensa gobbansa ledo xaadooshshe kalaqqanno gede dandiisiissannote.
Gobbayidi gobbuwara heedhannoti layinki Itophiyu ilama sase doyichonni gobbate giddora e`anno gede woshshatto shiqqinota xawisse; layinki ilama maatensa gobbansa ledo xaadooshshu hee`rannonsa gedenna ayimmansa affanno gede dandiissanno yitino.
Umi doyicho ‘’Connect to culture’’ yitanno woshshattooti yitinoti Ministircho: gobbayidi gobbuwara heedhannoti layinki Itophiyu ilama gobbansara eatenni loosantino loossa la`annonna towaattanno gede illachishshinote yitino.
Umi doyichonni Itophiyu lamala yaamamanno amuraate harinsannita coyidhe; Itophiyu huurubba yinanniri fakkanimma xawissanno qixxaawubba hadhannota xawissino.
Layinki doyicho “Connect to History” yaannoha ikkasi xawisse; layinki Itophiyu ilama dhaggensa huwattannohanna affannoha ikkannota coyidhino. Adiwu ayyaani ledo xaadannohonna dhaggensa affanno gede kaa`lannoho yitino.
Sayikki doyicho “Live our Legacy” yaanno su`ma uyinoonnita ikkase xawisatenni gobbayidi gobbuwara heedhannoti layinki Itophiyu ilama hanafantino loossa kaa`litanno gedenna kakkaooshshu beeqqo assitanno gede illachishshinote yite xawissino.
Woshshatto layinki Itophiyu ilama budensa dhaggensanna dagansa affanno gede dandiisiissanno. Baxxinohunni, Itophiyunnita daa’’attote iillubba egensiisate injaanno akata kalaqqanno yitino.
Amuraatu gumaamimmara Turizimete ministirchonni massagantanno komite uurrinsanni komitta nootano xawinsoonni.
Abbebech Maatewoos
Bakkalcho Sadaasa 18, 2016 M.D
