Addis Ababa:- Noonke elto illete leeltino jirora soorratenni woyyaawino Itophiya gatamarate loosonke kaajjinshe sunfeemmo yiino Xaphoomu ministirchi Abiy Ahimed (Dr).
Xaphoomu ministirchi hurbaate gobbate Koyishu Pirojekte biso ikkitinota Cebera Daaniichu Hoowi Looje maassi’re fani yannaraati tenne yiinohu.
Tenne yannara Xaphoomu ministirchi xawisanni; Itophiyu batinye elto aamantinose gobbaati; konnira Kontu Zoonera aamantinoti kalaqamu elto ikkado xawishshaati. Itophiya woyyaawino deerrira reekkisate sase coye batinse hasi’ranna wodancha hasiissanno.
Insano la’’ate, loosatenna kaajjinshe sufisiisate Jireenyuwa ikkansa xawisino.
La’’ate Jireenya yinannihu albaanni leellanno coye garunni la’’anna woyyaabbino kaayyo hee’rase wodanchate. La’’ate Jireenyi aamaminosikki manchi mulesi noo jiro asale ikkitasira dandiitanno yiino.
Aamantinonke elto la’’a hoongummoro woloottu la’’a dandiitannori adhitankera dandiitanno yiinohu Xaphoomu ministirchi; batinyootu la’’ate elto hoogansanni jirote aana ofolte heedheenna jironsa woloottu adhitannansa la’nannita kayisino. Konnira, eltonke garunni la’’a hasiissannonke yiino.
La’’ate Jireenyi callisi guma abbannokkita xawisinohu Xaphoomu ministirchi; loosate Jireenya harunsa hasiissannota coyi’rino. Jiro loosunni leella hoogguro horo afidhinokkihura la’’ate gedensaanni jawaante loosa qara ikkitinota xawisino.
Konnirano, anga moorunni, wodana bunshetenni co’eessi’ra hasiissannota qummeessino.
La’’atenna loosate Jireenyi gedensaanni agaratenna sufisiisate Jireenyi hasiisannota kayisino.
Mitto widoonni dhagge agaranna sufisiisa hasiissannota qummeesse; wole widoonni, daa’’ataano gibbannorinni meessaneeto agadha hasiissannota xawisino.
Daa’’ataano Itophiyu daga danchumma, wosincho adhanna halamme baxxannota xawise; keeru hoonginni Itophiya ikkadimmatenni la’’ate qarrantannota qummeessino.
Konnira sumuu assiissannonke coyibba heedhurono ninkenna gobbanke la’’ate dagganno daa’’ataanora hasiissanno agarooshshe assa hasiissano yiino. Kunino wole poolisete looso calla ikkikkinni; baalunku qansooti yawo ikkase xawisino.
Daa’’ataano wolu gibbanno coyi mooranna huuccatto ikkitinota xawise; gobba bushatenni woshshiishshanno coyibbanni qorowama hasiissannota coyi’rino.
La’’ate, loosatenna agarre sufisiisate Jireenyi aana illachishatenni eltonke illete leeltino jirora soorratenni woyyaawino Itophiya gatamarate loossa kaajjite suffannota buuxisino.
Xaphoomu ministirchi Abiy Ahimed (Dr) gobbayidi gobbuwara ilantinori layinki ilama Diyaaspooru miilla gobbansa dagganno gede woshshatto assino.
Gobbayidi gobbuwara ilantinori layinki ilama Diyaaspooru miilla Sadaasa 20/2016–Wocawaaro 20/2017M.D geeshsha sase doyichonni gobbansa higganno gede xa’mino.
Qiddist Gezzaheny
Bakkalcho Sadaasa 18, 2016 M.D
