Addis Ababa:- Adiwu muziyeme pirojekite tayxehu adiwu qeellete ayyaanira qixxaawa ikkite owaante uyitanno gede dandiisanno looso loonsanni afammannita Addis Ababu quchumi gashshooti jajjabba pirojekitubba qaru loosu gumulsiisaanchi Injiiner Debo Tunka xawisi. Babbaxxino miidiyubbate luphiima massagaanonna odeessaano Adiwu pirojekite sa`u lamalara towaattino.
Addis Ababu jajjabba pirojekitubba ijaarshi borro mini qaru loosu gumulsiisaanchi injiiner Debo Tunka xawisino garinni; adiwu pirojekite wo`munni wo`m 2016 M.D Adiwu qeellete ayyaanira qixxaawa ikkite owaante uyitanno gede loonsanni hee`noonni.
Injiiner Debo xawishshi garinni; pirojekitete ijaarshi roore anga gumulaminoha ikkanna xaa yannarano jeefote loossa loosantanni no.
Adiwu pirojekite xaphoomu loosi xibbuunni 95 anga ali jeefino yinohu injiiner Debo pirojekite 45 barrubba roortinokki yanna giddo jeeffe owaantete fano ikkitanno yino.
Pirojekitetenni owaante uyitanno bayichubba, pilaazubba, adiwu qaaggo sumudi ijaarsha lede, artetenna suuddate loossa gumulantanni afantannota xawisino.
Sannate keeshshinoha qeellete lawishshanna gobboomu horaameeyyimma gotti assite leellishshanno pilaazu loossa loosantanni afantannota buuxise; loossa arfaasu agani giddo jeefisate hasiisanno loosi gumulamanni noota coyi`rino.
Ledoteno Itophiyu dagaha daggete harinsho leellishshannoti artete loossa loosantanni afantannota xawisatenni mootichanna mootitte lede xaphooma olu uduunnenna olu aana beeqqitinota Itophiyu daga leellisha dandiitannota ikkase huwachishino.
Pirojekite hundi Itophiyu daga dhagge duduwatenni saeno dhagge kaajjisha hasiissannota leellisha dandiitannota ikkase xawise; baxxinohunni hundinni hanafe xaa geeshsha ilama nooseta dhaggete amado dagganno ilamara tareessate dandiissitannota ikkase buuxisino.
Addis Ababu quchumu gashshooti kantiiwi borro mininna kaawinete hajubba sooreessi kalaa Xilahun Werqu isi widoonni; quchumu gashshooti seedanna harancho yannanni mannu aana illachishshino pirojekitubba ijaarshatenni owaatamaanote fano assate aana no yino.
Adiwu muziyeme pirojekite Itophiyu daga mittimmate xawishshi tuuqaati yinohu kalaa Xilahun; projekitete ijaarshi jeefanno woyte gobbate gede luphiima owaante aanno yino.
Pirojekite shoole biliyoone birre ale ikkitino fulonni ijaarantanni nooha ikkanna pirojekitetenni muziyeme, boohaarshu bayichubba, kafteeriya, sinimanna duucha owaante uyitanno harubba lede kaameela uurrinsanninna daddalu minna afantanno.
Abbebech Maatewoos
Bakkalcho Sadaasa 11, 2016 M.D
