Addis Ababa:- Hawaasi quchumira babbaxxitino jaddo loossannore ugaanxanni seerunni xa’mantanno gede assinanni hee’noonnita Quchumu Keerunna Ga’labbote Biddishshi egensiisino.
Quchumu Keerunna Ga’labbote Biddishshi sooreessi kalaa Wendimmu Torba Itophiyu pireesete uurrinshara xawisino garinni; daga keeru hajo ane hajooti yite annimmatenni keerunna ga’labbote bissanni ledo qinaabbe loossanno gede assinanni hee’noonni.
Kalaa Wendimmu xawishshi garinni; Jaddo effi’re giwannonna jaddaasine duqqannokki dagooma kalaqate loonsanni hee’noonnitanna dagooma beeqqisino jaddo gargadhate loosinni jaddaasinenna halamaano xawo fushshatenna seeru aliidimma ayirrisiisate looso loonsanni afammannita egensiisino.
Quchumaho sa’e sa’e leeltannota mooru jaddo gargadhate ga’labbote tantano rifoorme assinoonnitanna, akatoomu xe’ne noonsare poolisete massagaanonna miilla loossino huno garinni qorichishantanno gede assinoonnitano coyi’rino.
Quchumaho qinaawino garinni millisse daga keerunni fulte e’annokki gede assitanno ikkitubba hooggurono; mooru dagate danchu gashshooti qarra ikkinota kaysinohu kalaa Wondimmu; baxxinohunni, dhoqidhoqqetenni gaangaabbanni meyaate borsa buttannore badate looso dagoomu ledo halamme loonsanni hee’noonnita buuxisino.
Konninni, Xexxerrisa horoonsidhe jaddo loossannore 123 ikkitanno jaddaasine bandoonnita coyi`re; kuri giddonni 70 ikkitanno jaddaasine Yoote mini gumulo sayiseenna seeru seejjo minira e`anno gede assinoonni. Jaddaaleeyye horoonsidhannota 20 ikkitanno Xexxerrisano seeru hundaanni hosiinsoonnita qummeessino.
Jaddo gargadhate looso irkisatenna yannoonsate sai 2015M.D hanafe quchumaho hobbaatu kaameerra qara qara dooggara, jajjabba Hoteellaranna uurrinshubbate qansanni gede assinoonnita qaagiisse; konni dirinnino 441 ikkitanno uurrinshubba sai sasu agani giddo hobbaatu kaameera qasidhanno gede assinoonnita kulino.
Kalaa Wendimmu; kunino baxxinohunni bute adhatenna mooru jaddo gumultannore shotu garinni badate dandiisiisinotanna jaddaasine yoote minira shiqinshanni yannara hobbaatu kaameerinni amandoonni taje mitte farco gede assine shiqishate kaa`litannota coyi`rino.
Mite mite yannara tiraafiikete jaddo iillitanno woyte ba’’ate wo`naaltanno kaameella hobbaatu kaameerinni amadate dandiinoonni yee; quchumaho tenne tekinolooje halashshate mixi`noonnitano xawisino.
Quchumaho hashsha barra dagate ledo qinaambe loonsanni hee’noonnihu kaiminni xaa yannara 24 saate millisa dandiisiissanno ga’labbote akati nootano xawisino.
Amadisiiseno, Hawaasi quchumi daa’’attote iillo ikkasinni ga’labbote hajora balaxo uyine keeru lawishsha, daa’’ataanote injaannohanna hee`rate halchinanniha ikkanno gede illachiinshe loonsanni hee`noonnita kalaa wendimmu lede buuxisino.
Abbebech maatewoos
Bakkalcho Sadaasa 11, 2016 M.D
