Addis Ababa:- Sidaamu qoqqowira amandoonni laalchu dirinni sa’u onte agannara 96 kume toone ado laashshine Industirete paarkubbara shiqisha dandiinoonnita Qoqqowu Saadate Latishshi Biiro egensiissu.
Biirote sooreessi Kalaa Tekile Jomba xawisino garinni; 2016 M.D sa’u 5 aganna giddo maatete Jireenya buuxisiisate loossanni daga sagalete wowensa dandiite dikko fushshite hiratenni miinju dhukansa lossidhannonna dikkote waagi lexxo ajishateno loonsoonni.
Handaarunni qansootaho loosu kaayyo kalaqate ragaannino sa’u dirrara loonsoonni loosinni danchu gumi maareekkamanni leellannota coyi’rino.
Biiro Adote, Lukkote, Diishshote, , Qulxu’mete, Gereewu, Haarrete da’muulchi latishshinna Saada xiikkate paakeejubbanni illacha tunge loonsanni hee’noonniha ikkanna; sa’u onte agannarano loosoho hasiisannorenna mannu wolqa wonshatenni mootimma ikkado baajeette gaamte loosu giddora e’inohu ontu aganinni maatete Jireenya buuxisiisate loosinni mixotenni 80% ale guma maareekkisiisa dandiinoonnita huwachishino.
Qoqqowoho 22 woraddara olluubba badatenni adote saada ceanonni daga bobbakke horaameeyye ikkitanno gede loonsoonni loosinni sai ontu aganni giddo 128 kume ikkitanno manni handaarunni horaameeyye ikkitinota qummeessinno.
Handaarunni baadiyyetenna quchummate 567 qansootira loosu kaayyo kalaqatenni adote guma dikkote shiqishate amandoonni mixonni 224 kume toone ado gamba assate dandiinoonniha ikkanna konni giddonni 96 kume toone ado Industirete paarkubbara shiqisha dandiinoonnita coyi’rino.
Handaarunni bobbakkinori laashshitino ado addi addi dikkora shiqishatenni horaameeyye ikkansano egensiisino.
Qoqqowoho 0.5 hekkitaare baatto aana xibbuunni 40% hattono xibbuunni 27% ikkitanno teessaano 0.5 hekkitaare baattora woroonni higgino basera teesse heedhannota kulinohu Biirote Sooreessi; atishshi Biiro tantanantu kawa konne qarra badatenni dagate noo bikkantino baattora saadate latishshi loossanni bobbakke horaameeyye ikkitanno gede assate addi addi xiinxallonna buuxo harisatenni woyyaabbino paakeejubba qixxeessine loosu giddora eatenni maatete Jireenya buuxisiisate looso loonsanni hee’noonni yiino.
Saadate sircho woyyeessatenna fayyimmansa agarantinore assate illacha tunge loonsanni hee’noonniha ikkana; saadate sagale qixxeessateno loonsoonni loosinni woyyaawino gumi maareekkamasi kulloonni.
Bajeettete dirinni 15 miliyoone dooze Saadate kittiwaate aate mixi’ne sa’u onte agannara 7 miliyoone ale dooze uynoonnita kulinohu Kalaa Tekile; saadate sagaleno 8 kume 440 hekitaare baattora latinsoonnita huwachishino.
Lukkuwu ceatto handaarinni 2.7 miliyoone ale Lukkuwa tuqinsoonniha ikkana; babbaxxitino Jajjabba mootimmate rosu uurrinshubbanni qajeelte fultino qansoottira sai bajeettete dirira 1 kumi 740ho hattono 2016M.D 1100 ikkitannorira loosu kaayyo kalaqate dandiinoonni.
Hattono Diishshote latishshi handaarinni 15 woradda bandeenna 7 kumi 700, Haarrete da’muulchi heqichinni 750 amuwi horaameeyye ikkansa kulinohu Kalaa Tekile; qajeeshsha aatenninna kosho qixxeese shiqishatenni mootimma baxxitino kaa’lo assitinota xawisino.
Qulxu’mete latishshi loossannino Abbaayunna Hawaasi Garbira loonsanni loosi midaadira 14 woraddara diilallote akatira injiitanno Qulxu’me shiqishatenni 187 Poonduwara Qulxu’me ceate loosono loosiinsoonni.
Saadate ceattonna xiikkate loosinnino dagooma horaameeyye assate xiikkate injiitannore Bongunna Awarru Gereewo abbine beenkoonnita lede coyirino.
Gaazeexu Odeessaanchinni
Bakkalcho Sadaasa 11, 2016 M.D
