Addis Ababa:- Rosu sekiterenni hananfoonni qoqqowu haaroonsote loosi guma anfannihu rosaanote ikkadimmanni, egennonninna akatoomu woyyaambenni ikkinota xawinsi.
“Rosu Isilanchimma Wo’munku Handaari Lophora” yaanno massagote qaalinni sayikki Sidaamu qoqqowi rosu sekitere gambooshshe tenne lamalara Hawaasi quchumira harinsoonni.
Gambooshshu aana afaminohu Qoqqowu pirezidaantichi kalaa Desta Ledamo gambooshshe hanafisiisi yannara coyi’ranni; rosu sekitere aana xaaddinota gumu hiiqqamme dhaawate rumuxxitino soorro abbate qoqqowu mootimma hasiissanno irko assatenni murci’raanchimmatenni loossanni afantanno.
Rosu sekitere aana hananfoonni haaroonsote loosi guma anfannihu rosaanote ikkadimma, egennonna akatoomi woyyaambenniiti yiinohu pirezidaantichu; deerra deerranko afantannori rosu sekitere massagaano rosu looso massagganni noo akata keennannihu rosaanote gummaa’manni ikkinohura gumulonke seekkine layi’ra hasiissanno yaanni huwachishino.
Wole widoonni, aantino ilama egennotenna akatoomunni ikkadda ikkitanno gede dandiisate hananfoonnita qoqqowu rosu haaroonso kaajjishatenni dureeyye rosu massagaano loosaasine hanaffinoonni irkonni suffinanno gede pirezidaantichu lede huwachishino.
Qoqqowu layinki pirezidaantichinna Rosu Biiro sooreessi kalaa Beyyene Baraasi isi widoonni; rosu ilama wo’munku raginni suudisate hasiisannoha ikkasinni konneno garunni gumulsate baalunku halamme hasiissanno yiino.
Qoqqowoho rosu iillo kaajjishate jawa looso loonse woyyaawino guma afi’noonniha ikkirono egennotenni, akatoomunna dandootenni ikkadda qansoota kalaqate widoonni xaano foonqe noota qummeessino.
Rosaanote gumi ledo amadisiisaminohunni jawa foonqe hee’rase bikkinni rosu minna rosatenna rosiisate loosira injiitinore assa xaano sa’noommokki qarraati. Konni daafira qoqqowinkera rosu sekitere aana qara qarrubba ikkitino hajubba bande rumuxxitino soorro abbate murci’raanchimmatenni loonsanni hee’noonni yiino.
Kalaa Beyyene ledotenni 2013M.D hananfe qoqqowoho rosu handaari aana qara hekko ikkinorenna gumu hiiqqamme kaimunni ittisate qoqqowu rosu haaroonso qixxeessatenni haammata looso loonse sa’noonni. Konninni, hagiirsiisanno guma borreessisatenni baalunku raginni jawaata ilama kalaqate loonsanni loosinni qoqqowu dureeyye, mootimmate loosaasine, hattono woloottu dagoomu bissa annimmatenni halantanni noota coyi’rino.
Qaqquullu balaxote rosinni hanaffe nabbawate, borreessatenna shallagate dandoonsa bowirtanno gede safo tugate looso loonsanni hee’noonnitano qummeessino.
Rosu qoqqowinkenna gobbanke Jireenya buuxisate safo ikkinohura baalunku uminke qeecha fullammora hasiisanno yaanni kalaa Beyyene lede sokkasi sayisino.
Rosu handaari aana xaaddino gumu anjeranna rosu hiiqqammera korkaata ikkitino hajubba bandoonniha ikkanna aantete baalanti hajo la’annonsa bissa agarantannonsa yawo fula hasiissannonsata duu’re xawisino.
Rosu sekitere aana hasi’nanni guma borreessiisate rosiisaanote maamarinna rosu sekiterenni ilama ikkadda assate loonsannita buuxise; aantete gobbate lophora luphiima qeecha amaddinota ikkasenni agaramannonkere assatenni yawonke fullammora hasiisanno yiino.
Sayikki qoqqowu rosu gambooshshi aana gobboomunna qoqqowu mitiimma giddoonni luphiima guma abbitino rosaanora, dancha jeefishsha borreessiissino woraddara, batinye rosaano sayissino rosu minnaranna rosu sekitere haaroonsora irko assitino dureeyyera afanshanna baraarsa uyinoonni.
Qiddisit Gezaheny
Bakkalcho Sadaasa 11, 2016 M.D
