– Itophiyu pireesete uurrinshanna Itophiyu Birodikastingete korporeeshiine qara loosu gumulsiisaano mootoonsinoonni
Addis Ababa:– 6ki dagate riqiwamaano amaale mini tenne lamala giddo harissino 3ki loosu diri 9ki uurrinshu songonni dukko Meelaateworq Hayilu Itophiyu Gobboomu doorshu boorde gambisaanchimma mootoonso kaajjishino.
Amaalete mini kalaa Mesaanfint Tafarra Itophiyu pireesete uurrinsha qara loosu gumulsiisaancho, hattono kalaa Geetinnet Taaddese Itophiyu Biroodikaastingete korporeeshiine qara loosu gumulsiisaanchimma mootoonso kaajjishino.
Itophiyu gobboomu doorshu boorde qara gambisaanchimma mootoonso amaalete minira shiqishinohu Mootimmate qaru woshshamaanchi ministirchi kalaa Tesfaye Beljige uyino xawishshinni; sa’u yannara gatamarroonni gummaamma uurrinshuwa mereerinni miitte Itophiyu gobboomu doorshu boorde ikkase xawise; loosu basesenni ka’ino albi Itophiyu doorshu boorde gambisaancho riqiwonni boordete gambisaancho ikkitanno gede dukko Meelaateworq Hayiluta Xaphoomu ministirchi Abiy Ahimed (Dr) shiqisheenna jeefote dooramaancho ikkite shiqase xawisatenni amaalete mini mootoonsa kaajjishanno gede xa’minoonni.
Amaalete mini miilla jeefote dooramaancho ikkite shiqqino dukko Meelaateworq Hayilu lainohunni hedo uyituhu gedensaanni Itophiyu gobboomu doorshu boorde gambisaanchimma mootoonso roorima huuronni kaajjiteenna dooramaancho amaalete mini albaanni shiqqe qaalu gondooro e’ino.
Amaalete mini Itophiyu gobboomu doorshu boorde mootoonso kaajjishihu gedensaanni Itophiyu Pireesete uurrinshanna Itophiyu Birodikastingete korporeeshiine qara loosu gumulsiisaano mootoonso buuxe kaajjishino.
Konninni garinni, kalaa Mesaafint Tafarra Itophiyu Pireesete Uurrinsha qara loosu gumulsiisaancho asse mootoonsino.
Kalaa Mesaafint Tafarrihu rosu qixxaawosinni Biroodkaastete odeessaanchimmanni Addis Ababu Yuniversitenni maasamino. Loosu rosichisino Addis Ababu quchumi gashshooti xaadooshshu Biirora odeessaanchimmatenni, sayinsetenna mashshalaqqete mereershi egennote gashshooti finco dayirektoreete gaamo massagaanchonna dayirekterimmanni, Xaphoomu ministirchi borro mine dagate xaadooshshinna ogeessimma hattono tenne mootoonso uyinisi yanna geeshsha Gobbayidi hajo ministere hundaanni Gobbayidi hajo Inistituute layinki loosu gumulsiisaancho ikkatenni owaatinota xawinsoonni.
Amaalete mini barraho kalaa Geettinnet Taaddese Itophiyu Biroodkaastingete korporeeshiine qara loosu gumulsiisaancho asse mootoonsino.
Kalaa Geetinnet Taaddese rosu qixxaawonni Dhaggete rosinni dipilooma, umi digiresi Bahirdaarete Yuniversitenni odeessaanchimmatenna xaadooshshunni hattono layinki digiresi odeessaanchimmatenna xaadooshshunni Addis Ababu Yuniversitenni maassamino.
Loosu rosichisino, Amaaru Maas Miidiyira odeessaanchimmatenni owaatinoha ikkanna Waalta Miidiyinna xaadooshshira odeessaancho taje qixxeessatenninna addi addi loosu base massagatenni loosino. 2010M.D hanafe tenne mootoo’ma uyinisi yanna geeshshano Itophiyu Pireesete Uurrinsha qara loosu gumulsiisaancho ikke owaatanni keeshshinota xawinsoonni.
Qiddist Gezaheny
Bakkalcho Sadaasa 11, 2016 M.D
