Addis Ababa: – Muli dirra kawa Abbay Kofattora gamba assinanni eo ero lexxitinota Qinessote Pirojekte Borro Mini egensiisino.
Abbay Kofatto Qineessote Pirojekte Borro Mini Miidiyunna Kominikeeshiinete Dayrecterich Kalaa Haylu Abrahaamihu Itophiyu Pireesete uurrinshara xawisanni, muli dirra kawa dagoomuwiinni Abbay Kofattora gamba assinanni eo la`nanni woyte ero lexxinota xawisino.
Soorrote albaanni diru giddo gamba assinanni eo 9 xibbe miliyooneeti yiinohu Dayrekterichu, soorrote gedensaanni dirunni 1.7 biliyoone birra ali eo gamba assiannni hee`noonni.
Gamba assinanni eo babbaxino korkaatinni diru dirunni lexxitanni woy ajjanni daggurono, mereerima guma la`nanni woyte luphiimaho yee, 2013 M.D 2.2, 2014 1.6 nna 2015 baajjetete diro 1.4 biliyoone birra gamba assa dandiinoonnita xawisino.
Eessinanni eo aana konni ali soorro borreessa dandiinanninka yee qummeesse, mite mite qoqqowubbara babbaxitino yannara kalaqamino hobbaatu qarri korkaatinni, eo konni ale lexxitannokki gede assino yiino.
Amaaru, Tigirayete, Affaaretenna Oromiyu qoqqowubbara gaance gea hooga noohura rosamino gede daga haammatte irkote beeqqaano ikkitanni dino yiino.
Konne ikkeennano, kofatto jeefisate gamba assinanni hee`noonni eo luphiimate; gaancenna olu eote aana xiiwo kalaqino yaa didandiinanni yee huwachshino.
Diyaasporunninna dagoomunni gamba assinanni he`noonni eo Abbay Kofatto jeefisate gamba assinanni hee`noonni irko diru dirunni lexxitanni dagginota Dayrekterichu kulino.
Qoqqowubbate Abbay Kofattora eo gamba assate millimmo loonsanni hee`noonnita xawise, diyaasporu isi widdoonni noosi qeecha fulanni noota coy`rino.
Abbay Kofatto ijaarira eo gamba assa hananfi yannanni kayise 18 biliyone ale Itophiyu dagawiinna Itophiyu ilamawiinni gamba assinoonnita xawisino.
Tayxeno bocu boci diro calla 383 miliyoone 213 kumi ali birra gamba assinoonnita kulinohu Dayrekterichu, Sidaamu Qoqqowira Abbay Kofatto ijaarira 108 miliyoone birra ale gamba assinoonnita bowirsino.
Kalaa Haylu lede, kofatto hananfunkunni 170 biliyoone birra gundoonnniha ikknna, ijaaru 90% xibbunni ale iillino; jeefisate 60 biliyoone ali birra hasiisannota xawisino.
Abrahaam Saamueel
Bakkalcho Sadaasa 4, 2016 M.D
