Addis Ababa:- Haaru Rosunna qajeelshu poolisenni qixxaabbino rosatenna rosiisate Maxaaffa 2ki dirimi Mootimaamenna Hallanyu rosi minna rosiisanora egensiisate qajeelshi woraddatenna quchummate mereershubbara uynanni hee’noonnita Sidaamu qoqqowi Rosu Biiro egensiissu.
Biirote Layinki sooreessinna rosu budinna Tekinoolooje halashshate handaar massagaanchi kalaa Miliyooni Yossihu xawisino garinni; Layinki dirimi Rosi Minna Rosiisaanora haaru rosunna qajeelshu poolisenni qixxaabbino maxaaffa rosiisaanote egensiisate qajeelsha Qoqqowoho Bocaasa 20/2016M.D hananfe 37 woraddanna quchummate gashshoottara uyinanni keeshshinoonni.
Haaro rosu budi soorro kaiminni balaxotenni kayinse umi dirimi geeshsha maxaaffa qoqqowu mootimmanni 346 Miliyoone birra gaammeenna attamante rosaanote iillitanni nootanna qajeelsha uyine sai diro loosu giddora e’noonita kule kalaa Miliyoone kule; 9ki-12ki kifile deerrihu Rosu ministere deerrinni qixxaabbe attamante iilliteenna rosaanotenna rosiisaanote konni dirinni iillinshoonnita xawisino.
Amadisiiseeno, haaro maxaaffa mootimmatenna hallanyu 2ki dirmi rosi minna rosiisaanora qajeelsha aate qoqqowu mootimma zoonnatenna woraddate massagaanora, rosu borro minna sooreeyyera, 2ki drimi rosu minna murrootiranna qajeelshiishaanote xaphooma 516 haja la’anonsa bissara qajeelshsha uyinonnita coyi’rino.
Aanteteno, shoolente zoonnanna Hawaasi Quchumi hundaanni gashshooti hundaanni afantanno 2ki dirimi mootimaamenna Hallanyu rosi minna rosiisaanora woraddanna quchummate gashshooti halammenni qajeelsha uynannita kule; tinino rosu isilanchimma woyyeessate assinanni hee’noonni sharrora lowo qeecha afidhinota xawisino.
Gaazeexu Odeessaanchinni
Bakkalcho Sadaasa 4, 2016 M.D
