Addis Ababa:- Dagate riqiwamaano amaale mini laashshaano interpirayizooti kaajjillira assanno irko kaajjishe sufannota amaalete mini songaafichi kalaa Taaggese Chaafo xawisi.
Ninke laalchi laashshaano interpirayzooti egzibiishiinenna baazaare “Itophiyu laashshito ninkeno dikki`no” yaanno massagote hedonni bero hananfoonni.
Dagate riqiwamaano amaale mini songaafichi kalaa Taaggese Chaafo tenne yannara xawisino garinni; Itophiyu jirote widira soorrama dandiitanno haammata kalaqamu elto ayidde ikkase buuxisino.
Kalaqamu elto jirote widira soorrate qajeeltino mannu wolqa, dikkonna kalaqo hattono gobboomu hasattonna kalqoomu akata huwante loosa xa`mitanno yiino.
Konni kaiminni mootimma laashshaano interpirayizootira uyitino illachinni haammata gobbaydi gobbuwanni e`anno laalchubba gobba giddo laalchubbanni riqiwa dandiinoonnitaati xawisinohu.
Itophiyaho laashshaano industirra irkisanna jawaachisha jiroo`mitinotanna jawiidi Itophiya kalaqate sharro ikkitinota coyi`rino.
Dagate riqiwamaano amaale mini laashshaano interpirayizooti horaameeyyimma lossitanno seeru woyyeessubba assannono yiino.
Laashshaano interpirayizooti dhuka lossate hasiissanno irkonna harunso assinannitano coyi`rino.
Industirete ministirchi Melaaku Allebel isi widoonni; mootimma tonnu diri massagaancho latishshu mixonni baddino onte miinju illachu handaarranni laashshaanote industirra handaari mittoho yiino.
Konninnino loosu hayyo woyyeessubba assatenni liqoote shiqisho, safote latishshi gatamaarshanna dikkote xaadooshshe kalaqatenni handaara irkisanni noota xawisino.
Tonnu diri latishshu mixo goofimarchinni gobbaydira sonkanni laalchinni 9 biliyoone doolaare ale eo afirate mixi`noonni yiino.
Itophiyu laashshito millimillonni 370 ali industirra loosu giddora eessatenni laashshaanote interpirayizooti laachonna laalchimma lossa dandiinoonni yiino.
Konninnino ga`labbote bissa seeru uddanno lede gobbaydinni e`annota babbaxxitino laalchubba gobba giddo laalchinni riqiwatenni 2.3 biliyoone doolaare ale gatisa dandiinoonnita buuxisino.
Egzibiishiinenna baazaare bero hanaffinote techo lede onte aantino barrubbara keeshshitanno.
Abbebech Maatewoos
Bakkalcho Sadaasa 4, 2016 M.D
