Itophiyu diilallote qoqqowira ammansiissannonna addaxxinanni agaraanonna ogimmatenni ikkadimma noonsa buuwisaano hattono, teknishaanoota kalanqanni hee’noommoha ikkasinni wo’manka woyte ayirrinyunna naaxxillu macciishshamannonke yitino diilallote wolqa qajeelshu massagaanonna rosiisaano.
Itophiyu diilallote wolqa qajeelshu mereershi kalqoomu ikkadimmate bikkaancho wonshitinorenna yannate teknolooje xiinxallitino buuwisaanonna teknishaanoota kalaqqanni afantannota coyidhino. Safantunkunni 88 dirra kiirsiissinoti Itophiyu diilallote wolqa, gobboomu soorro gedensaanni mootimma ga’labbote uurrinshuwara uyitino baxxitino wodhotenna baajeettete illachinni illete leeltino soorro assitino. Lawishshu gedeno mannu jiro gatamarshi handaarinni diilallote qoqqowo ammansiisanno garinni agarsiissannorenna yannate tekinolooje ikkadimmatenni massagganno buuwisaanonna haaroonsitanno ogeeyye qajeelsitanni afantanno.
Itophiyu diilallote wolqa qajeelshu mereershi diine koloneel Lammi Maammohu; Itophiyu diilallote wolqa qajeelshu mereershi macca buuwisaanonna haaroonsitanno ogeeyye (Teknishaanoota) kalaqatenni diilallote wolqa mannu jiro gatamarshi badhete miqicho ikkite loossanni afantannota xawisino.
Soorrote gedensaanni diilallote wolqa mannu jiro dhuku gatamarshinna ogimmate qajeelsha gatamarate sokko luphiima ikkadimmanni fultanni afantannota qummeessino.
Diilallote wolqa diilallote qoqqowo ammansiisanno garinni agartanno gede buuwisaanonna teknishaanoota yanna iillitino teknolooje qajeeltinore ikkitanno gede hashshanna barra qajeelsitanni afantannota coyi’rino. Itophiyu ayirrinye agarsiisate aleenni naaxxisiisanno loosi dino yinohu Koloneel Lammi; diilallote wolqa Itophiyu diilallote qoqqowira ammansiissanno agaraano ikkansa xawisino.
Diilallote wolqa 1981 M.Dnni karsaminohu Maaster Teknishaane Girmi Roobahu; Yesu 27, Mig 21 nna wolootano olu jettuwa Teknishaane ikke seeda dirrara owaatinoha ikkanna sa’u 14 dirrara kayinni diilallote wolqa qajeelshu mereershi rosiisaancho ikke loosanni afamanno.
Master Teknishaane Girmi Roobihu yaatto garinni; diilallote wolqa miila ikka ayirrinyeno naaxxilleno ikkase coyi’ranno. Baxxinohunni Itophiyu diilallote wolqa qara illacha ikkinohu mannu wolqa gatamarshi aana bobbahatenni macca buuwisaanonna haaroonsote ogeeyye kalaqa hagiirre kalaqqannota coyi’rino.
Itophiyuno anino hee’neemmohu diilallote wolqa heedhurooti yinohu Maaster Teknishiyaan Girmi; aantete ikkadda buuwisaanonna Teknishaanoota kalaqate heeshshosi diro wo’ma loosannota buuxisino.
Itophiyu diilallote wolqa gobbatenna dagate hobbaatira badhete miqicho ikkase qummeesse; gobbayidinni daannohanna giddoonni heedhe mitiinsitanno diinna ammansiisanno garinni gargadhatenni gobba ayirrinyisenni sufisiissinota coyi’rino. Konnira qole Teknishaanootunna buuwisaanote qeechi luphiima ikkasi xawise; baxxinohunni horophilla haaroonsatenni gobba fushshitara dandiitannota gobbayidi soorro gatissannore wedella ogeeyye kalaqa uyitanno hagiirri luphiimaho yino.
Qajeelaano ledotenni diilallote wolqa Afriku diilallote wolqa massagaancho ikkate amaddino mixo gumulsate qajeelshu mereershi Afrikunna wolootu gobbuwa diilallote wolqa qajeelshu mereersha ikkite loossanno gede uminsa qeecha fultannota xawissino.
Qajeelshu amado kalqoomu deerra agarino garinni qixxeessine loosu giddora e’noonnita xawissinori massagaano; qajeelshu, horophilluwanna wolootu uduunnino yanna iillitinowa afantannoreeti yitinno.
Itophiyu diilallote wolqa gobbate diilallote qoqqowi agaraano ikkansa huwatte uurrinsha karsante gobbansa owaattanno gede woshshatto assinoonni.
Itophiyu diilallote wolqa 88ki diri safote ayyaana xaphoomu qixxaawo albiidinke Sadaasa 6,2016 M.D addi addi qixxaawonni ayirrinsanni.
Qiddist Gezzaheny
Bakkalcho Sadaasa 4, 2016 M.D
