Addis Ababa: – Dhukiweelo Itophiya kalaqate hasidhanno bissa olantote aana fantinohu su`ma hunate gaadi olanto deantanno gede diassannonsa yee IFDR Gargarooshshu Olanto Itamazhoore Fiild Marshaal Birhaanu Jula xawisi
Fiild Maarshaali Birhaanu Jula Itophiyu Odoote Owaante ledo assino keeshshonni xawissanni; tenne yannara mite mite wolqa olantote su`ma xursiisatenni olanto uynoonninsa qeecha fultannokki gede hattono deantanno gede assate su`ma hunate gaado fantino.
Olantote aana su`ma hunate gaado fantinori kuri mannooti, mitte xa`mo nafa noonsakkire hunaasine ikkitinore qaxa`rtinota kulinohu Fiild Maarshaal Birhaanu, Olanto Itophiyu olanto ikkkitino korkaatinni gobba gargadhate dhuki woffi yaannonna, uwanno gede assate, gawajjote reqecci yitino gobba kalaqate loossanno wolqaati yiino.
Wole widoonni, Itophiyu daga ikkite heedhe olantote aana su`ma hunate gaado fantino mannooti sokka adhite loossannoreeti yiinohu Fiild Maarshaal Birhaanu, Itophiyu olanto xaa yannara kaajjado olanto ikkitinotanna konne diinnankeno seekkite affinota qummeessino; Konnira, olanto daafurtanno gede hasidhannohura haammata hunaasine hidhite qaxartino yee coy`rino. Ikkinohura, “Aganu damooza baattanni miidiya uytanno; olantote aana hunote gaado fannanni gede assitanno” yiino.
Gobbate giddo noo diinnanke woy qodhaano hasidhu gede burraaqqaannokki gedenna hasattonsa wo“mitannokki gede assatenni jawa looso loossinori Gargarooshshu olantooti yiinohu Fiild Maarshaali, insa hasidhanno gedee qodhotenni sharro assa, keeru dirinni ikko wole widoonni ikko gobba diigate, cancishate, mimmitu ledo giwanshiishate assitanno xagarronsa mullicho assitinori gargarooshshu olantooti yiino.
“Ninke hasatto wo`mitannokki gede assinohu” yite hassanno yannara jawaate noohu gargarooshshu olantooti yiinohu Fiild Marshaal Birhaanu, ninkera sokka noonke; sokkanke gobbbanni dawo giddonni wolqatenni, xiiwe, gadache urdete qasara daannoha gobbate bayriid seeri amuraate garinni wo`mu dhukinni olamate yiino.
“Olanto billaalitino; jeneraalichu ledo giwantino; eweli jeneraalichu qorichishamino; noowa hee`re usuramino” yitanno mullicho yorto dihoollanni yiinohu Fiild Marshaal, gargarooshshu olanto kaajjadu xinti aana ijaarantinote; cancu kai kiironni billaallitanno olanto dinonke yiino.
Fiild Maarshaal xawisanni, olanto jawaatu xinti aana ijaarante, umisenni massagantanno amanyootu nooseha ikkanna, illacha assannohu maara olamannoronna ayii ledo olamannoro afinoho; mittu ollii hedo nookkiho; Itophiyimma udirinohonna Itophiya agarate sokko adhinoho.
Gargarooshshu Olanto sokka gobbate utuwimma agarate yiinohu Fiild Maarshaal, agarannohuno gadawa uxxenna goda loose ikkikkinni, gobbate utuwimma agarannohu qajeelanni, umosi gatamaranni, qodhe, dhukasi lossanni gobba agrannota xawisino.
Wolu, Gargarooshshu olanto pooliisete dhukira aleenni ikkinohanna bayriidi seeri amuraate wolqatenni diigara daynoha ayino gobbate giddo noo qodhaasine qeela noosie gede sokko uynoonnisi yiino.
Gaazeexu Odeessanonni
Bakkalcho Sadaasa 4, 2016 M.D
