Addis Ababa:- Arri gorsu Qamadenni xaa geeshsha 1 miliyoone 6 kume hekitaare ali baatto wixunni diwantinota Gibirinnu ministere egensiissu. 117 miliyoone kuntaala laalcho afirate baalante qoqqowubbara hala`ladunni loonsanni hee`noonni.
Gibirinnu Ministerera Dagate xaadooshshinna komunikeeshiinete loosu gumulsiisaanchi kalaa Kebbede Laaqew Itophiyu pireesete uurrinshara xawisino garinni; Arri gorsu Qamade ledo amadisiisaminohunni budillaanchotenninna Tiraakiteretenni hawuuratenna baatto wixaho qixxeessate loossa loonsanni afammanni. Xaa geeshsha 1 miliyoone 65 kume hekitaare ali baatto Arri yanna gorsu Qamade wixinni diwantino.
Loosu gumulsiisaanchi xawishshi garinni; tayxehu Arri gorsu millimillo 3 miliyoone hekitaare baattonni 117 miliyoone kuntaala laalcho afi’rate baalante qoqqowubbara hala`ladunni loonsanni hee`noonni. Balaxote qixxaawote gafinni Bocaasa 17/2016M.D geeshsha budillaancho doogonni 1.1 miliyoone hekitaare baatto; Tiraakiteretenni 638 kume hekitaare xaphooma 1.5 miliyoone hekitaare baatto hawuurroonni. 1 miliyoone 65 kume 791 hekitaare baatto wixunni diwantino. Konninni baalanti qoqqowubba balaxote qixxaawonni hanaffe loossanni afantanno.
Iillinoha goyirete gide gamba assate qoteho Arri gorsu Qamade latisate loosi kaajje sufino yiinohu loosu gumulsiisaanchi; haruudde tekinoloojubba horonsi`ne laalchimma lossa dandiinanni akatubba aanano huwanyo kalanqanni hee`noonnita xawisino.
Arri gorsu Qamadera qoteho uurrinshu gorsu loossa gumaa`mino garinni loosantanni nootano buuxise; uurrinshu gorsu loosinni atikiltenna laalote gumma hala`ladunni latisate hende loosu widira e`noonnitano egensiisino.
Loosu gumulsiisaanchi; babbaxxitino way doorshubba horonsi`ratenni Arri gorsu Qamade halashshatenni Qamadete hasatto gobbate giddo riqiwate wo`ma dhuka gatamarroonniyiino. Kuni yanna yannantenni lophanni ha`rannoha latishshu looso ikkasino buuxisino.
Gobbate giddo hasattora hasiisannohu 170 miliyoone kuntaala ikkinotanna konne goyiretenni, badheessunninna arrunni noo yannubbara Qamadete hasatto diwate dhuka kalanqoonni yiino.
Giwirinnu mekaanayzeeshiine horonsi`ratenni hawuurranni baattonna gamba assinanni gide lossate loosi kaajje sufannota coyi`re; baxxinohunni, Arri gorsu Qamadera tekinoloje halashshate loosi aana illachunni loonsannita lede buuxisino.
Abbebech Maatewoos
Bakkalcho Bocaasa 27, 2016 M.D
