Addis Ababa:- Sidaamu kominiite maamari Addis Ababu quchumira heedhanno Sidaamu ilamara dagoomitte yawonsa fultanni noota xawissu.
Addis Ababaho Sidaamu Kominiite maamari dirunnita uurrinshu songo sa’i sambata Oromote Budu Mereershira harissino.
Kominiitete Maamari Boordete Gambisaanchi Kalaa Miesso Birbeessihu xawisanni; Addis Ababaho nooti Sidaamu Kominiite gobbate giddo tantanantino uurrinsha ikkite; IFDR Siivilete Dagoomi Uurrinshara tajete kiironni 4839 aana borreessantino dagoomu maamara ikkase egensiisino.
Kominiitete Maamari IFDR Siivilete Maabari Ejensenni afamishsha afi’ri kawa haammata dagoomitte qeecha fulanni noota coyi’rino.
Kominiite Maamarihu qaru illachi Sidaamu qoqqowi ilama ikkite Addis Ababaho heedhannore gamba assatenninna qajeelsatenni loosu kaayyo kalaqate yiinohu Kalaa Miesso; quchumaho heedhannoti Sidaamu ilama haammata ikkiturono, mimmitu ledo xaande gambooshshe kalaqate aana mitiimma noota kulino.
Kominiite tenne ilama xaadisatenna dagoomu mittimma heedhanno gede assate widoonni umise qeecha fultanni nootano xawisino.
Addis Ababaho Sidaamu Kominiitehu Qaru Loosu Harisaanchi Kalaa Isiraeeli Mehaammed isi widoonni; sai 2015M.D loosu gumulshi ripoorte shiqishi yannara, kominiite xintante loosu giddora e`u yannanni hanaffe haammata looso loossinota xawise; quchumaho haammatu wedellira loosu kaayyo kalaqqinota qummeessino.
Wedellaho loosu kaayyo kalanqoonni handaari atikiltenna gummaamu laalonni, koatte biifisatenni, qoleno sagaletenna buna ganfe hirranni manaadda loossa aana bobbaasatenni ikkinota qummeessino. Loosu kaayyo kalanqoonninsa wedelli loosinsanni gummaamma ikka dandiitanno gede balanxe qajeelsha aatenni Kominiite 1 miliyoone ali woxeno irko assitinota huwachishino.
Kalaa Isiraeeli xawishshi garinni, Kominiite Sidaamu budenna hornya lossatenna bowirsate widoonni kaajjado looso loossanni noota coyi`re; diru dirunni ayirrinsanniha Sidaamu dagaha diru soorro Fichee Cambalaallate ayyaani Itophiyu qaru quchumira ayirrisamanno gede qeechase fultanni noota qaagiissino.
Battalate aana ontu diri mixo songote shiqqeenna torbinoonni.
Tenne yannara Sidaamu Kominiite Maamari miilla ikkitinori 2 kume ale ikkitannotano Qaru Loosu harisaanchi kalaa Israeeli buuxisino.
Abrahaam Saamueel
Bakkalcho Bocaasa 27, 2016 M.D
