Addis Ababa:- IFDR Dagate riqiwamaano amaale mini dimokiraasete hajubba uurrinshu komite bero Itophiyu tuqu xaadooshshi biilloonyira basete leellatenni faajjetenni loosu towaanyo assitino.
Towaanyote gedensaannino uurrinshu komite gambisaanchi kalaa Iwunetu Allene uyno hedonni; Tuqu xaadooshshuwa hedonsa ruxxi yitukkinni xawisatenni halaalaancho mashalaqqe dagoomaho iillishshanno Itophiyu Tuqu xaadooshshuwa biilloonyi lallawunni uynoonnisi yawo kaiminni loosanni noota coyi’rino.
Tuqu xaadooshshuwa halaalaancho mashalaqqe dagoomaho iillishate yawo heedhunsarono so’rote mashalaqqe dagoomunniwa iillite woloottu qoosso kissannokki gede Tuqu xaadooshshuwa biilloonyi assanno harunso kaajjishe sufa noosita huwachishino.
Biilloonyu loosu mini loosaasine annimmate macciishshammenni uynoonninsa sokko garunni gultanni noota la’nooniha ikkanna; woloottu loosu minnarano dancha lawishsha ikka dandiitannota kalaa Iwunetu Allene coyi’rino.
Uurrinshu komite laynki gambisaanchi kalaa Azimera Andemo isi widoonni uyno hedonni; uurrinshu komite Biilloonyu loossa towaanyo assini yannara jawaachishshanno loossa gumulantanni noota huwata dandiinoonni yiino.
Biilloonyu loosu mini uynoonnisi yawonna loossa garunni gumulanno gede assate hasiissanno lallawubbanna wodho fultanno gede uurrinshu komite agarrannise irko assitannotano kalaa Azimera lede xawisino.
Itophiyu Tuqu xaadooshshi biilloonyi qaru dayrekiterichi kalaa Mehaammed Idriisi isi widoonni; uurrinshu komite miilla Biilloonyu loosu minira basete geeshsha leelte loossate harinsho faajjetenni la’’ansa Biilloonyu lallawunni uynoonnisi loossanna yawo garinni loosate irko ikkannota coyi’rino.
Amsaalu Felleqe
Bakkalcho Bocaasa 27, 2016 M.D
