Yirgaalame:- Sidaamu qoqqowira sai 2015M.D mussinna gargartanno komite tantanatenni loonsoonni loossanni 96 miliyoone ale ikkannoha dagatenna mootimmate woxe mooraminoha qolsiisa dandiinoonnita xawinsi.
Qoqqowu Amanyootunna Tsere-Mussinnu Komishiine tayxe dirinni kalqoomu deerrinni 20ki, gobboomu deerrinni 19ki hattono qoqqowu deerrinni 18ki yannara tsere mussinnu barra “Mussinnu gutu diinankeeti; halamme sharrammo’’ yaanno adawarshinni sa’u muli barrubba giddo Yirgaalamete quchumira ayirrissino. Barete leelle hasaawa assinohu Sidaamu qoqqowi mootimma layinki pirezidaantichinna Rosu Biiro sooreessi kalaa Beyyene Baraasihu coyi’ranni; gobbankera ikko qoqqowinkera mannu amanyootunna tiiu ba’nenni dagate la”aato moore usuramanni no yiino.
Mussinnu dagate hagiirrenna dancha halchonsa moorannoha ikkasinni massangeemmo qarqarto moorunna bainchu assootubbanni keeraansine daganke latishsha buuxisiisanna buximatenni fushshate murci’ne loosa hasiissanno yaanni huwachishino.
Mussinnu dagatenna gobbate agurranna moorannohurano diinaho yiinohu kalaa Beyyene; bainchu assootinni ayirraddu mannooti shollitanna maatensano shollishshanna la’noonni yiino.
Tenne yannara hananfoonni gaadinni moorriro xa’mammannita huwachishinohu kalaa Beyyene; mussinnanna baincho assootubba sharramatenni qoqqowo latinohanna buxima ba’ino qarqara assate noonketa kalaqamunna mannu loosino jiro garunni horoonsi’ra hasiissannota qummeessino.
Qoqqowu Amanyootunna Tsere-Mussinnu Komishiine qara komishiineritte dukko Zelaalem Lemma ise widoonni; qoqqowoho rumuxxe keeshshinoha mooranna baincho assoote buqqisate sa’u muli dirra kawa jawa illacha tunge loonsanni hee’noonni. Sai 2015M.D qoqqowu deerrinni mussinnanna baincho assoote gargartanno komite tantanne loosatenni xaphoomunni 96 miliyoone ale dagatenna mootimmate woxe mooraminoha qolsiisa dandiinoonnita xawissino.
Babbaxxitino dagatenna mootimmate jajjanna woxe moortinonna hafanfarsitinota huluullammoonnire 355 manna seerunni xa’mantanno gede assa dandiinoonnita kultinoti Sooreette; mussinnu hasattonna mussanyootu kiiro ajishatenna ciiggishate dagoomunna haja la’annonsa bissanni ledo halamme loonsanni hee’noonni yitino.
Amadisiisseno, sai dirira xaphoomunni 218 qummeessubba komishiine shiqqinota haa’ne buuxatenni mussinnunni huluullammoonni mannoota seerunni xa’mantannonna mooramino woxe qolsiisatennino sae 112 miliyoone ale dagatenna mootimmate jajja mooramannokkinna hafanfarannokki gede gargara dandiinoonnita qummeessitino.
Mussinnunna bainchu assooti akatisinni qansootu baalunku diina ikkasinni baalanka mitteenni gawajjannoho yitinoti komishiineritte Zelaalemi; mussinnu gawajjo seerunni irkinse gargarate albillichono effi’ne sharrama baalunku qeecha ikkinota ledde xawissino.
Amsaalu Felleqe
Bakkalcho Bocaasa 27, 2016 M.D
