Addis Ababa:- Fakkanimmate aana xintantino daganna dagoomu mittimma kaajjisha sufote keeriranna latishshu gatamaarshira xinta ikkinota Sidaamu qoqqowi songaafitte dukko Faantaye Kebbedeti egensiissu.
Hawaasi mereershira “asalunni donu widira” yaanno massagote qaalinni harinsanni hee`noonniha 4ki dayicho qajeelsha harunsitanni afantannoti mootimmate massagaano bissa 18ki daganna dagoomu barra techo Hawaasi yuniverisitera addi addi qixxaawonni ayirrissino. Battalate aana afantinoti Sidaamu qoqqowi amaale mini qara songaafitte dukko Faantaye Kebbedeti xawissino garinni; daganna dagoomu mittimma kaajjishate fakkanimma adha hasiissanno.
Gobbate gede noonke fakkanimma gobbankera latishshunna lophote xinta ikkasenni baalunku awuuta hasiissannota huwachishshino.
Diru dirunni ayirrinsanni barri daganna dagoomu egennamannonna roorenkanni xaadanno gede assate ragaanni luphi yiino qeecha noosita kayissino. Songaafitte leddeno fakkanimmate aana xintantino daganna dagoomu mittimma kaajjisha sufote keeriranna latishshu gatamaarshira xinta ikkase xawissino.
“Sidaamu daga sannate kayissanni keeshshitino xa`mubba soorrote mootimmanni dawarantinosi” yitinoti qara songaafitte “afi`noonni turrufaatubba sufisate gobbate daganna dagoomi ledo rodiimmate macciishshammenni gutunni loosatenni ledote qeellera jawaantanni” yitino. Sidaamu qoqqowi qaru mootimmate woshshamaanchi kalaa Abrihaam Marshallo isi widoonni “babbadooshshe sumuu yine adhine gobboomu mittimmara loosanna Itophiyimma xawisa hasiissanno yannaati” yino.
Babbadooshshubbanna fakkanimmate ayimmubba xawoho xaaddanni roorenkanni mittimmansa kaajjishshanno gede daganna dagoomu barri ayyaani qara ikkinota coyi`rino. Ayyaanu Itophiyu dagaha gutu dhagge kaajjishatenna gotti assine leellishate qeechisi luphiima ikkinota buuxisino.
Gobboomu mittimmanna halamme roorenkanni kaajjitanno gede albiidi massagaano daga qineessatenni loosa hasiissannota huwachishino. Baxxinohunni hasiissannokki dhegge aguratenni gutu halaalubba aana illachishanna gobba ajireenyu widira tareessate ilama beeqqisino looso loosa hasiissannota egensiisino.
Babbaxxitino qooxeessubbanni daggino mootimmate massagaano bissa gutunni gamba yaansa mimmitu ledo xaadooshshe kaajjishatenni gobboomu mittimma kaajjishate kaa`lannoha ikkasi xawisinohu qole Hawaasi yuniverisite pirezidaantichi dokiter Ayyaano Baraasiho.
“18ki daganna dagoomu barri ayyaani daganna dagoomu mittimma leellishanno garinni Yuniveristete ayirrisamasi massagaano qajeelshunni afi`dhino egenno assootunni buuxate dandiisanno” yiino.
Hee`noommo yanna mittimma hasidhannota ikkasenni Itophiyu bayriidimmara gutunni loosa hasiissannota qummeessino. Ayyaanu aana dukkisantino qajeelaano massagaano bissa mereerinni dukko Yinesebiil Hamid “Itophiyu fakkanimma dukkisantanno gobba ikkase baxxitinota assannose” yitino.
Qajeelshunni afi`noonni egenno loosu widira soorratenni barra ayirrisa hasiissannota xawissino. “Qajeelshunninna ayyaanunni leeltino mittimmanna daganna dagoomu biinfilli aye woyteno xawishshanke ikke sufa hasiissanno” yitinoti qole siister Gennet Gelleessote. Gobbate gede xaaddinonke qarrubba sa“ate mittimma kaajjishanna gutunni loosa hasiissannonkeno yitino.
18ki daganna dagoomu ayyaani woraddatenni kayise qoqqowubbate geeshsha addi addi amanyootinni ayirrisamanni keeshshinoha ikkanna; Bocaasa 29/2019 MD ayyaani Sumaalete qoqqowira Jigijigaho xaphi yaanno. Aantete ayirrinsate kaayyo adhanno qoqqowano ikko quchumu gashshoote barraho faajje assinanni yine agarranni.
Gaazeexu Odeessaanchinni
Bakkalcho Bocaasa 27, 2016 M.D
