Addis Ababa:- Xaphoomu ministirchi Abiy Ahimed (Dr) sa’u muli barrubba giddo addi addi gobbuwara assino loosu tawaananyonna babbaxxitino songo beeqqo guma afi’noonnita ikkase Mootimmate
Komunikeeshine Owaante ministirchi Leggese Tullu (Dr) xawisi.
Ministirchu xawishshi garinni; Xaphoomu ministirchi Abiy Ahimed (Dr) sa’u muli barrubba giddo Awuropahonna Halantino Arawete Emireetootira assino keeshshonna addi addi songora beeqqasinni dancha guma afi‘noonnitanna Itophiyu ayirrinyi bowire leellinoha ikkasi la’noonni.
Xaphoomu ministirchi Abiy keeshshosinni; Halantino Mootimmuwa Uurrinsha Industirete latishshi uurrinsha diru songo, diilallote akati massagaanote songo beeqqinoha ikkanna; hattono Cheek- Ripebilikete faajjetenni loosu towaanyo assino yiinohu Leggese Tullu (Dr); songote qoteho addi addi gobbuwanna kalqoomu uurrinshuwa massagaano ledo gummaamo ikkinoha gutu hasaawa assinota xawisino.
Xaphoomu ministirchi Industirete latishshi uurrinsha songora ayirradu wosinchimmanni beeqqanno gede koyinseenna barete leellinota qaagiisse; duuchu handaari beeqqo noohanna sufinoha Industirete latishsha buuxisiisate songo beeqqinota coyi’rino.
Songote babbaxxitino miinju woyyeesso assatenni gummaamma ikkitino gobbuwaha dancha rosicho shiqinshoonniha ikkanna; Xaphoomu ministirchino Itophiyu sa’u onte dirrara miinju woyyeesso assatenni dancha guma maareekkisiisa dandiitinotanna gobbuwano irko assa hasiissannota xawisino yaanni huwachishino.
Songo, Itophiyu haanju harumi loossanni, sagalete wowenni, Leemaatete turrufaatenna woloottu handaarranni afidhino rosicho kalqete dagoomira leellishshinoha ikkase kaysinohu Ministirchu; baxxinohunni, Halantino Mootimmuwa Uurrinsha Industirete latishshu uurrinsha qaru dayirekiterichi Itophiyu qinaabbino gibrinnu Industirenna wolootta fiixoonsitanni loosate assitanno wo’naalshi wolootta gobbuwara addi rosicho ikkara dandaannota coyi’rino yiino.
Lophitino gobbuwa Itophiyu gede seyoote widira reekkanno looso loossanni noo gobbuwara irkonsa kaajjishshe sufa noonsata Xaphoomu ministirchi egensiisinoha ikkanna; Itophiyu haanju harumi loossanna seyoote harinsho leellishshanno Ekispo faninotano Leggese (Dr) xawisino.
Ledoteno, kalqoomu songora qoteho addi addi gobbuwanna kalqoomu uurrinshuwa massagaano ledo lamooshshu hasaawa assinota yiinohu ministirchu; baxxinohunni, halamme halashsha womaashshu Investimente lainohunni torbatenni eewaancho dawaro afi’noonnita kulino.
Wole widoonni, Xaphoomu ministirchi Abiy Ahimed (Dr) Cheek-Ripebilikete assino faajjete loosu towaanyonni gibrinna yannicha assa, Industirete, Diilallote wolqa dhuka gatamarate loossanno uurrinshuwanna dureeyyete ledo hasaawinota xawisino.
Wole widoonnino, ‘’Coop 28’’ songo aana shiqishino hedo loosu aana illachishshinota qummeesse; diilallote akati soorro gargadhate haammata wo’naalsha assinanni yiinota xawisino.
Itophiyu haanju harumi loossahu danchu lawishshi wolootta gobbuwarano kakkaooshshe kalaqinoha ikkasi kule; babbaxxitino gobbuwa Itophiyunniha haanju harumi dancha lawishsha harunsite chigginyete kaashsho hanaffinota kayisino.
Xaphoomu ministirchi Abiy Ahimed (Dr); Halantino Arawete Emireetootira assino keeshshonni addi addi hasaawubba assinoha ikkanna; baxxinohunni Beeljiyeemete Xaphoomu ministirchi, qooxeessunna Ahigure lainohunni lamooshshu hajubba aana hasaawa assinota coyi’rino.
Ledoteno, Kuubu pirezidaantichi ledo rosu, fayyimmatenna daa’’attote handaarinni gutunni loosate dandiinanni hayyo lainohunni torbino.
Amsaalu Felleqe
Bakkalcho Bocaasa 27, 2016 M.D
