Hawaasa:- Sidaamu Baanke gutu maamari xaphooma jiro 1.3 biliyoone birri ale iillinota egensiissu. Baankete gutu maamari 2ki doyicho uurrinshunna, 2ki wiinamu xaphoomu songo bocaasa 15/2016 MD Hawaasi quchumira harinsoonni.
Sidaamu Baanke sai diri Baankete jeefishshi riipoorte songote shiqishshinohu daayirikiterootu boorde gambisaanchi kalaa Abirahaami maarshallo xawisino garinni; Baanke Biheereewe Baankewiinni fajjo afidhe guuta Baankete owaante aate assitino millimmonni kaapitaale lossitanni dagginota kule; xaa yannara baankenniti jiro 1.3 biliyoone birri ale iilla dandiitinota qummeessino.
Gumulami Baajeettete dirinni 287 Miliyoone birri ale afi’rate mixo amande; 275.8 miliyoone birra eo maareekkinoonni yiinohu kalaa Abirahaami; jeefishshu mixotenni 96 % ikkinota qummeessino. Albi baajeettete dirinni ledo heewisiinsiro 55.8% lexxo leelinotano buuxisino.
Baajeettete dirinni 60.7 miliyoone birra tirfe afi’rate mixo amandoonnita kayisinohu Kalaa Abirahaami; 63 miliyoone birri ale tirfe afi’ratenni mixote ale jeefisa dandiinoonnita qummeessino.
Baankete kaapitaale 293.3 miliyoonera noowiinni 826 miliyoone birri widira lophinoha ikkanna; ofollinno woxi bikki 229 miliyoone birra iillasino riipoortetenni xawisino.
Aanteteno Biheeraawe baanke wortino 5 biliyoone birri baantoonni kaapitaale jeefisate illacha tunge loonsanni hee’noonnitano qummeessino.
Baankete Industire lophitanni yanna yannatenni heewo kaajjitanni dagginota kulinohu gambisaanchu Sidaamu Baanke hettisamaanchonna silancho ikkitanno gede bilchaata massagonni illacha tunge loonsanni hee’noonnita coyi’rino.
Konninnino owaatamaanote bilchaatanna addaxxitanno owaante aate yanna abbitino tekinoloojenni irkinse owaante shiqishate loossa loonsanni hee’noonnita huwachishino.
Bocaasa 15/2016 MD harinsoonni xaphoomu uurrinshunna wiinamu songonni dayirikiterootu Boorde Awuropu kiiro garinni 2022/2023 baajeettete diri loosu jeefishshi riipoorte macciishshiishanna kaajjisha, gobbayidi oditeeroota Awuropu kiiro garinni 2022/2023 baajeettete diri diru odiite riipoorte macciishshiishanna kaajjisha lede wolootta hasaawu umma aana torbinoonniha ikkanna; aantete massagganno dayirikiterootu boorde doorsiissannore doorreenna songo xaphi yitino.
Yaareed Geetaachew
Bakkalcho Bocaasa 20, 2016 M.D
