Addis Ababa:- Hawaasi quchumira 2016M.D umikki bocu boci dirira 4.6 biliyoone birra kaapitaale borreessiissino dureeyyera haaro Investimentete fajjo uynoonnita Quchumu Investimentete halashsho borro mini egensiisi.
Hawaasi quchumi Investimentete halashsho borro mini sooreessi kalaa Taaddese Fiqire Itophiyu pireesete uurrinshara xawisino garinni; Hawaasi quchuma Investimentetenna daa’’attote injiinoha assatenni Investimente halashshate jawa illacha tunge loonsanni hee’noonni.
Amandoonni 2016M.D umikki bocu boci dirinnino gobbate giddonna gobbaydinni dureeyye dagganno gede egensiisate loossa loonsoonniha ikkanna; babbaxxitino handaarranni 12 gobbate giddo dureeyye haaro Investimentete fajjo fushshidhino yiino.
Tinino, Industiretenni, Hoteeletenni, hattono wolootta handaarranni xaphoomunni 4.6 biliyoone birra kaapitaale maareekkisiisse haaro fajjo fushshidhe loosu giddora eate balaxote loossa loossanni afantannota coyi’rino.
Kalaa Taaddese xawishshi garinni; luphiima kaapitaale maareekkisiisse haaro fajjo adhiturono uminsa baatto aana loosi’rate xa’midhino garinni harancho yanna giddo loosu giddora e’anno gede Investimentete wodhonna biddissi fajjanno garinni harunsonna irko assinanni hee’noonni.
Mittichu dureessi mootimmatewiinni baattonna Investimentete fajjo adhi gedensaanni mittu diri giddo 1/3 anga hattono shoole dirra giddo wo’munni wo’ma latisa hoogiro amadino baatto baattote baankera eo assinannita Liizetenna Investimentete lallawi fajjannotano qaagiissino.
Lallawu kaiminnino, baatto adhitu gedensaanni latissukkinni huxxite wortino bissa anganni haa’ne wodhote garinni kaapitaale noonsarinna latisa dandiitanno dureeyyera aate; ijaara hanaffe uurrissinoha ikkiro qoleno shiqishidhino mixo garinni loossannokkire kayinni qorophishsha aatenni wirro loosu giddora e’anno gede; hattono looso hanaffinori aan babbaxxitino mitiimmuwa xaaddanno woyte mootimma tirtanno gede assate xiinxallo gunde hee’noonnitano xawisino.
Gobbate babbaxxitino qoqqowubbanni ikko gobbaydinni dagge Hawaasi quchumira Investe assate hasidhanno dureeyye koysate illacha uyne loonsanni hee’noommo yiinohu kalaa Taaddese; xaa yannara quchumu keerunna ga’labbo teessinoha ikkasinna babbaxxitino handaarranni bobbahate hasidhannorira 70 hekitaare ale ikkitannoti hala’lado baattto qixxaabbe noota lede kulino.
Hawaasi quchumi daa’’attotenna Investimentete mereershaati yiinohu kalaa Taaddese; gobbate giddonni ikko gobbaydinni dagganno dureeyye hasidhanno handaarranni fajjo adhite bobbaha dandiitanno gede Investimentete borro mini ikko quchumu gashshooti dureeyye dayoe bushshu yitte adhate qixxaabbinota lede qaagiissino.
Amsaalu Felleqe
Bakkalcho Bocaasa 20, 2016 M.D
