Addis Ababa:- Kalqete Baanke Itophiyaho saadatenna Qulxu’mete jiro latishshinni meentonna wedella miinjunni horaameeyye assate loossa irkissannota xawinsi.
Gibrinnu ministirchi Girma Amente (Dr) Kalqete Baanke loosu massagaano ledo ikkatenni tenne lamalara Sidaamu qoqqowira Saadatenna Qulxu’mete jiro latishshi pirojekte irkonni loosantinota latishshu loossa towaanyo assino.
Kalqete Baanke Itophiyu, Eertiru, Sudaanenna Wodiidi Sudaane kaantiri dayrekterichi Osmaan Diyooni tenne yannara coyi’ranni; pirojektete irkonni Saadatenna Qulxu’mete latishshi handaarinni qoqqowoho loosantino loossa jawaachishshannote.
Ikkinohura, Itophiyaho Saadatenna Qulxu’mete jiro latishshi meentonna wedella miinju horaameeyye assate assinanni hixamanya irkinseemmo yiino.
Pirojektetenni meentunna wedellaho loosu kaayyo kalaqatenna miinjunni horaameeyyimmansa buuxisiisate dandiisiissannonna woloottahono lawishsha ikka dandiitannoti gummaamma loossa gumulantinota la’’a dandiinoommo yiino; dayrekterichu.
Ledotenni loosu kaayyo kalaqate, qooxeessu miinja jawaachishatenna qoqqowoho hattono gobboomu deerrinni lopho abbate ragaanni luphiima qeecha afidhinota xawisino.
Gibrinnu ministirchi Girma Amente (Dr.) isi widoonni; gobboomu deerrinni sai dirira maatete Jireenyi millimillo hananfoonnita qaagiisse; Saadatenna Qulxu’mete latishshi pirojekte widoonni millimillo wo’munni wo’ma loossa irkisantanno gede assinoonnita coyi’rino.
Konninni, Lukkuwu, adote, Qulxu’metenna malawunni 26 kume qachuwa kalanqoonni yiino.
Kalanqoonni qachuwara Saadate sircho woyyeessatenni mittu barri caacurre, yannitte Diidu koshshanna wolootta hasiissannore shiqishatenni irko assinanni hee’noonnita xawisino.
Sai dirira 42 miliyoone mittu barri caacurre bebbeehate dandiinoonnita xawisinohu Ministirchu; tayxe dirinnino 62 miliyoone mittu barri caacurre shiqishate mixi’ne loonsanni hee’noonnita egensiisino.
Tayxe dirinni umikki bocu boci dirira 9 miliyoone 500 kume caacurre bebbeeha dandiinoonnitano hattonni.
‘’Leemaatete turrufaate’’ na labbinore gobboomu mixonke mootimmate baajeettenni calla gumula didandiineemmo yiinohu ministirchu; hallanya uurrinshuwa pirogiraammansa gobboomitte timo irkissanno garinni fiixoonsinanni loonsanni hee’noonnita coyi’rino.
Sidaamu qoqqowira Daalle woradi Wodiidi Masanqali olliira ‘’Kaayyo Seyoohe Lukkuwu Ceatto Maamari’’ gambisaanchi wedellichu Taayye Taammiru uyno hedonni; jaallasi ledo ikkatenni Lukkuwu ceatto loosira bobbahe maamarunni mittu barri caacurre abbisiisatenni lossitanni dikkote shiqishshanni gummaamma ikkitinota coyi’rino.
Albillichono loosonsa halashshatenni roorenkanni horaameeyye ikkate mixo noonsatano kulino.
Gaazeexu Odeessaanchinni
Bakkalcho Bocaasa 20, 2016 M.D
