Addis Ababa:- Tayxeha dagatenna dagoomu barra qoqqowu garinni ayirrisate addi addi qixxaawo assine loosu giddora e’noonnita Sidaamu qoqqowi Amaale mini Songaafitte dukko Faantaye Kebbedeti xawissu. Gobboomu deerrinni Bocaasa 29, 2016 M.D ayirrinsanniha dagatenna dagoomu barra Sidaamu qoqqowira Bocaasa 1,2016 M.D hananfe addi addi qixxaawonni ayirrinsanni keeshshinoonnita songaafitte xawissino.
Bocaasa 1- Bocaasa 20, 2016 M.D geeshsha zoonnate, woraddate, quchumu gashshoottaranna olluubbate geeshsha dirrine ayirrinsanni keeshshinoonniha ikkanna; qoqqowu deerrinni kayinni Bocaasa 22, 2016 M.D xaphi assine ayirrinsannita coyidhino.
Sidaamu qoqqowi amaale mini songaafitte dukko Faantaye Kebbedeti Itophiyu pireesete uurrinsha ledo assitino hasaawinni; 18ki yannara ayirrinsanni dagatenna dagoomu barra ayirrisate addi addi mixo amande gumullanni hee’noonnita xawisse; mundee aatenni, buxanete mine haaroonsatenna hurbaate itisatenni hattono Ispoortete millimmo assatenni ayirrinsannita qummeessitinno. Konne loosono Bocaasa 1 hananfe zoonnatenna woraddate ayirrinsanni yannara gumullanni keeshshinoonni yitinno.
Tayxeha dagatenna dagoomu barra gobboomu deerrinni Bocaasa 29,2016 MD Sumaalate qoqqowira Jigijigaho ayirrinsanniha ikkanna; Qoqqowu deerrinnino Bocaasa 22,2016 M.D xaphi assinanni.
18ki yannara ayirrinsanni dagatenna dagoomu barra “Fakkanimmanke taalleenyi gobboomu gottimmara” yaanno massagote qaalinni ayirrinsannita kultinoti dukko Faantaye; qoqqowunni kayinse olluubbate geeshsha dagate hattono rosu minnara dagatenna dagoomu barra lainohunni huwanyo kalaqate qajeelsha uyinanni keeshshinoonnita xawissino.
Baxxinohunni Federaalizimete mayimmanna federaalizime Sidaamu dagara assitino kaa’lo lainohunni qajeelsha uyinoonnita kayisse; Sidaamu daga ayimma ayirritinohuno federaalizimetenniiti; qoqqowuno federaalizimete gumaati yitinno.
Konni daafira baalunku barra ayirrisa hasiissannonsata qaagiissite; daga barraho uddi’ransanna amma’nonsa garinni biiffe hanqafaanchimmanna mittimma agarino garinni ayirrissanno gede sokkase sayissino.
Qiddist Gezaheny
Bakkalcho Bocaasa 20, 2016 M.D
