Hawaasa: – Bakkalcho gaazeexi Federaalete deerrinni attamamasi Sidaamu giddo noo daga mashalaqqe afiinsanni nabbabbe huwattanno gede assanni noota mite mite Bakkalcho gaazeexa nabbabbino bissa coydhino. Nabbawaano tenne xawissinohu Gaazeexu sase diro guutise shoolki diro hanafasi harunsite wortino hedonniiti.
Sidaamu Qoqqowi giddo noo woraddara loosaasine ikkitino nabbawaano Bakkalcho gaazeexira fultanno mashalaqqe yanna yannatenni nabbabbannota xawisse; Sidaamu Afii lophorano umisi qeecha fulanni noo gaazeexa ikkinota huwachishino.
Sidaamu Qoqqowi Woga, Turizimenna Ispoortete Biirora, Seesi Qalote Dayrektere hundaanni Wolliimma Wogate Sirbunna Diraamu Gaamo Qara Loosu Harisaanchi Kalaa Asinaaqe Ayyalihu hedosi aanni, Sidaamu qoqqowa ikke tantanami kawa daggino gumma giddo mittu Bakkalcho Gaazeexi Federaalete Sidaamu Afiinni attamama ikkinota kul; gobbatenna qoqqowoho noo mashalaqqe bude, balchooma Sidaamu Afiinni shiqishanno gaazeexa ikkasi kulino.
Kuni gaazeexi Federalete deerrinni attamamasi Sidaamu afii mageeshshi geeshsha lophanni ha`ranni nootanna dagano afoose, budesenna balchoomase lossate assidhanno harinsho aana gaazeexu jawa qeechasi fulanni noota xawisino.
Gaazeexu giddo noo amado nabbawanno yannara sekke la“annota coy`rinohu Kalaa Asinaaqe, addi addi uminni shiqqanno mashalaqqe addintanni danchate; ikkirono, albillicho baxxinohunni Sidaamu woga, budesenna balchoomase hattono galtinosenna, Sidaamu gobbate noo duduwo soorri`rannota hashshi waaresi amadino gafa shiqishiro gaazeexu adhamooshshe ledannota coy`rino.
Bakkalcho gaazeexa borreessine shiqinshanni jirte, fidalsate amuraati afuu lophora, afuu saayinsenna xiinxallonniha ikkinota leellishanno garinni borreessamanni no; kuni leellishannohu ogeeyyete ikkadimmanna bilchaata massago nootano xawisanno yiino.
Malga Woradi Meentu Qaaqqullunna Dagoomittete Hajo Borro Mine loosaasincho ikkinohu Kalaa Niguse Danieelihu isi widoonni, gaazeexu Itophiyu deerrinni Sidaamu afiinni qixxaawe attamamasi, daga kolishshu wayinni kayisse, Cirrete geeshsha noori mashalaqqe uminsa afiinni afidhanno gede assanni noo gaazeexa ikkinota kulino.
Gaazeexu iillo albi yannara mommodu noota xawisinohu Kalaa Niguse, muli yanna kawa woyyaawanni no; amadosino danchate, ikkollana investimentete aana, mentunna qaaqquullu widoonni rosicho aanno gafa lendiro dancha ikkinota qummeessino.
Bakkalcho gaazeexi, Sidaamu bude, balchoomasi borreessinoonnihanna borrotenni xawinsoonnikkiha baala amade shiqishanni rosicho aanni nooha ikkasinni daga baxxe nabbabbanno gaazeexaati yiinohu Daarrate Woradi Daddalunna Dikkote Latishshi Borro Mini Sooreessi Kalaa Memmiru Mokaho.
Kalaa Memmiru Mokahu sa`u dirrara Woradu Mootimmate Kominikeeshiine Borro Mine massagi yannara, Bakkalcho gaazeexa duucha yannara nabbawannota kule, konni albaanni Sidaamu daga budesenna qaalese lossi`rate sharrantanni keeshshitino; Bakkalcho gaazeexi tenne sharro gumaati yiino.
Kalaa Abiy Worqinehu Sidaamu Qoqqowi Ammanyootunna Tsere Mussinnu Biiro daagate xaadooshshi ogeessaati. Bakkalcho gaazeexa duuchanka woyte nabbawanno; gaazeexu amado dancha ikkitinota kule, baxxinohunni dagate danchu gashshooti qarri aana xiinxallote odeesaanchimma aana ledde loossuro gaazeexu adhamooshshi ledanota amaalino.
Abrahaam Saamueel
Bakkalcho Bocaasa 13, 2016 M.D
