Addis Ababa:- Shane ledo lame doyichonni harinsanni keeshshinoonni hasaawi sumimme nookkiha gumulaminota Mootimmate Komunikeeshine Owaante egensiissu.
Tenne hajo lainohunni Mootimmate Kominikeeshine Owaante Bocaasa 11/2016M.D fushshitino xawishshinni; Keerunna ga’labbo mitte gobba latishshunna Jireenyu kaimaati. Babbadamooshshe kalaqqanno hedubba hasaambe tidhate bude lossate gobbaanni afi’nanni keeri dino; bowirtanno mittimmano diheedhanno.
IFDR mootimma tenne hedo kaiminni poletiku akata halashshate, poletiku pirogiraame beeqqitannokki paartuwa ledo mootimmate biilloonye gutantino.
Konni ragaanni bayiriidi seeranna gobbate ayirrinye adhite ayirrisatenna ayirrisiisate qixxaabbinori hiittenne wolqano ledo hasaabbe qarrubba keeru doogonni tirate qixxaabbinote.
Konninni, mimmito shaa gatteenna harinsannihu doorshu amanyootinna gobba gashshate rosicho bowirsate, qawwe qodhite bayiriidi seera wolqatenni diigatenna wolqatennni biilloonye amadate wo’naaltinori ledono duucha yannara hasaawa assatenni gobbate keere halashshate wo’naallanni keeshshinoonni.
Kuni noo gedeenni hee’reennanni, gobbate gargarooshshu olanto heedheenna wolu garinni qodho amadate, mootimma heedheennanni wole mootimma ikkate hasatto hasaawa gaa’line rosicho assi’rate harinsho gobbate hegeraamimmara jifo ikkitinota mootimma huwattanno.
Ikkinohura, mootimma gadachante e’ino gaance uurrisate kaajjado qaafo adhatenni gobba hegersate bayiriidi seeri gadacho fultanno.
Konni garinni Oromiyu qoqqowira babbaxxitino qooxeessubbara qodhite sharramatenni dagate lubbonna jajji aana jawa gawajjo iillishshanni keeru guffa ikkitanni keeshshitinori cancishaano Shane wolqa ledo agannate albaanni Taanzaaniyaho Zaanzibaari harinsoonni hasaawi gaxa ganikkinni gatinoti qaangannite.
Konni hasaawi yannara cancishaano gaamo 60 dirrara albaanni Oromoteno ikko wolootta Itophiyu daganna dagoomi xa’mubba ikkite keeshshitinotera dawaro qolloonniha ikkirono; xa’mubba wirro kayissino. Baxxinohunni, soorrote yanna kawa loosu aana hossino hajubba wirro xinqitanni kayisate gobbanni waa kayissanno hajo haadhe shiqa dandiitinokihura, mootimmate widoonni cincatenninna sumuu assate aana calla huxxante keeshshitanno gede assa doorroonni hajootinkanni.
Sa’u lame lamalarano cancishaano gaamo sa’u so’ronsanni rosse hasaawaho shiqishshanno hedubba gobba iillitino gafi ledo sumuu assate wo’naallanniha ikkanno yitanno hexxonni layinki doyicho hasaawa Taanzaaniyaho Daare Selaami harinsanni keeshshinoonni.
Cancishaano gaamo widoonni tenne doyichonnino mootimmate aana wole mootimma ikkate hasattonna gobbatenna dagate elannokkire shiqishate gobbaanni hasaawaho ikkitanno hedubba shiqisha didandiitino. Kayinnilla, IFDR mootimma widoonni gobbate keeru ge’’eenna Itophiyu nooseha kalaqamunna mannu loosino jiro loosunni jirote widira soorratenni Jireenya buuxisiisate noose halcho kaiminni gaamo shiqishshino hedubbara gumulo aate wo’naaltino.
Kayinnilla, cancishaano gaamo keeru yannara hiittoonni hee’ra dandiitannoro hedate shette leeltino. Qansootu mundeenna shettonni dadda’la doodhitino. Ikkinohura, sa’u lame lamalara harinsanni keeshshinoonnihu keeru hasaawi sumimme nookkiha gumulamino.
IFDR mootimma amaddinohu keeru malinna hasaawunni qarrubba tirate uurrinsha noo gedeenni heedheennanni seeranna bayiriidi seera agarsiisate sokko kaajjite suffanno. Tenne dagonni keeru doogonni qarubba tirate yine assinoonni hasaawa massaggino bissara mootimma galata shiqishshino.
Gaazeexu Odeessaanchinni
Bakkalcho Bocaasa 13, 2016 M.D
