Shoolki diro amadinohu Bakkalcho Gaazeexi, gobboomu uurrinsha giddo Sidaamu afiinni attamame woloottu afuubbanni attammanni gaazeexuwa qote dijitaaletenna attamotenni mashalaqqete bue ikkasi jawa kaayyo ikkasi albihu Sidaamu qoqqowi dagate xaadooshshi biiro sooreessinna xaa yannara Aliyye Sidaamu Zoone layinki gashshaanchi kalaa Filiphoosi Naahoomihu coyiri.
Bakkalcho gaazeexi Sidaamaho mashalaqqete bue ikke dijitaaletenna attamotenni iillanno gede assa Sidaamu daga sharrote gumi sumudanna soorrote malaate ikkasino qummeessino.
Kalaa Filiphoosi Naahomihu Bakkalcho Gaazeexi safo yannara qoqqowu mootimma assitino millimillonni uminsa beeqqo assitino qoqqowu loosu massagaano mereerinni mitto ikkanna; Sidaamu daga jawa gobboomu uurrinsha giddo afiinsanni beeqqitanni afantannoti jawa kaayyooti yiino.
Bakkalcho gaazeexi uurrinshate giddo wole afuubbanni fultanno Gaazeexxa qote dagate mashalaqqe iillishatenni,budenna jiro xawisanni afamannota kulinohu kalaa Filiphoosi; qoqqowu giddo barru barrunku ikkitubba borrotenni maareekkanni gobbatenna kalqete mashalaqqeno iillishanni afamannota hasaawisinni kayisino.
Itophiyu Pireesete Uurrinsha hundaanni Sidaamu afiinni attamame lamalatenni mitte hige fulannohu Bakkalcho Gaazeexi kolishshu waayinni kayise Cirrete geeshsha noo Sidaamu dagara gobboomunna kalqete mashalaqqe buenni mitto ikke shiqasi Sidaamu daga sharrantino xa’mo higate malaateeti yiinohu kalaa Filiphoosi; kunninnino afuu lophora heedhannosi horo luphiimate yiino.
Konni gobbaanni Bakkalcho Gaazeexi Sidaamu afiinni attamame iilleenna nabbawatenni ledote; gobboomu uurrinsha giddo attamame konne deerra iillasi umisenni daganniwa jawa tiro afidhinota qummeessinohu sooreessu; gaazeexa hanafisiissu mannootinni mitto ikka’yanni hagiirru macciishshamanno’’e yiino.
Aanteteno gaazeexu amadosinni konni aleenni islanchimmatenna iillotenni woyyaawinoha ikke woloottu afuubba Gaazeexxa gede xiiwo kalaqannohanna hasamannoha assate loosa hasiissannota xawisino.
Hattono islanchimmasi agarantino garinni albaage sufa dandaanno gede qoqqowu mootimma, Zoonnate gashshootta, mootimmannita ikkitinokki uurrinshuwanna hajo la’annonsa baali uurrinshate ledo halamatenni Bakkalcho Gaazeexa jawa deerra iillishate annimmatenni qeechansa fultanno gede qaagiissino.
Jeefoteno Bakkalcho gaazeexi Shoolki diri ledo amadisiise Gaazeexu qixxeessaanonna Itophiyu Pireesete Uurrinsha hawalle tashshi yiino’ne yitanno sokka sayisino.
Qiddist Gezaheny
Bakkalcho Bocaasa 13, 2016 M.D
