Addis Ababa:- Xaa yannara kalaqantanni noo gansho labbeemme fayya gargadhate dagoomu mini diddo fooliishsho assi’ranna fayyimmate merereershubbara ha’ratenni buuxi’ranna xagisi’ra hasiissannota qoqqowu dagoomu fayyimmate inistitiyuute egensiissu.
Sidaamu qoqqowi dagoomu fayyimmate inistitiyuute dayrekiterchi Jeneraal D/r Daammene Debaalqe Itophiyu pireesete uurrinshara xawisino garinni; xeenu yanna jeefase harunse birru aganinni hanafe gobbate gede gansho labbeemme fayya leeltanni no.
Kaimise vayrese ikkino gansho labbeemme fayya Sidaamu qoqqowi giddo Hawaasi quchuma lede baadiyyete qooxeessubbarano hala`ladunni leeltanni no yiinohu dayrekiterchu; dagoomu huwanyoote lossate tuqu xaadinna fayyimmate uurrinshuwa widoonni luphiima looso loonsanni afammannitano egensiisino.
Xaa yannara gansho labbeemme fayya gobbaanni sa`e sa`e kovid 19 na RFB yinanni vayrese nootano assinanni hee`noonni buuxonni huwata dandiinoonni yiino.
Dayirekiterchu xawishshi garinnino; wolootta labbeemme malaatta leellishshanno xissuwano noohura xiwamaano fayyimmate mereershubba ha’ratenni la“isiisi’ranna gansho labbeemme fayya ikkituro mini giddo ikkado fooliishsho assi’ranna iibbinore aga hasiissanno.
Buuxo assinanni hee`noonnihu Adaare Hospitaalera calla ikkinota xawisannohu dayrekiterichu d/r Daammene; malaatu leellinonsare xaginsanni hee`noonnitanna lamalate giddono 25-30 ikkanno manni aana vayrese leellate kaayyo luphiima ikkitinota buuxisino.
Amadisiiseno tino fayya harancho yanna giddo foolunninna kikkisamatenni taraawate akatoomi nooseta ikkasenni gargadhate looso illachunni loonsanni hee`noonnita xawise; dagoomu afuunna sanote maaske horonsiranna angate co`ichimma saamununninna sanitayizeretenni agadha hasiissanno yiino.
Dagate hodhishshuwa, rosu minnaranna mannu gamba yaanno basera maskoote fana hasiissannota qummeessinohu dayirekiterchu; dagoomu fayyate malaatta leeltannosi woyte fayyimmate mereershuwa ha’ratenni buuxonna xaginaate afi’ra hasiissannota hattono gargadhate aana luphiima qoropho assa hasiissannota coyi`rino.
Abbebech Maatewoos
Bakkalcho Bocaasa 13, 2016 M.D
