Addis Ababa:– Sidaamu daga umise mootimma safidhe umose gashshate assitino sharronni afidhino kaayyubba mereerinni Federaalete deerrinni Bakkalcho Gaazeexi attamo hanafa mitte kaayyooti.
Techoo sayikki diro Bocaasa 10/2013 MD Sidaamu daga dagate huuronni wolaphitu umi diro ayirrissanna Bakkalcho gaazeexi furduggisi. Gaazeexu Albisa Itophiyu Pireesete uurrinshanni attammanni addi addi afuubba mereeo kaayyo afi’re techo sase diro guutise shoolki dirosi mite yee hanafino.
Bakkalcho gaazeexi shoolki diro amadasi harunse ledonke keeshsho assinohu Itophiyu pireesete uurrinsha layinki loosu gumulsiisaanchinna amadote handaari sooreessi Kalaa Fiqaadu Ketema yiino garinni; Sidaamu daga umise umose gashshate seeda yanna sharro assitanni umise mootimma safi’ratenni ledote baca kaayyo afidhino.
Kuri kaayyubba mereerinni Federaalete deerrinni Sidaamu Afiinni Gaazeexu attamo hanafamate yiinohu kalaa Fiqaadu; hattenne yannara IItophiyu Pireesete uurrinshano babbaxxitinota uurrinshate loossa woyyeesso harissanni noo yanna ikkase kaysino.
Itophiyu duuchu dagoomi gobba ikkasenni dagoominniha Afoo, bude, balchoomanna hornyubba lossatenna bowirsate hattono dagate dhagge latishshunna duuchu handaari loossa millimmo borrotenni maareekkate mootimma jawa illacha tugginoha kaima assatenni Pireesete uurrinsha babbaxxitino Afuubbanni Gaazeexxa attamate looso gumultanni noota coyi’rino.
Kalaa Fiqaadu xawishshi garinni; uurrinshate sa’u 80 dirra ale ikkitanno yannara Addis Zemeni Gaazeexa, aanteteno Ingilizete Afiinni ‘’The Ethiopian Herald’’, Arawete Afiinni ‘’Al-Alem’’, Oromote Afiinni ‘’Bariisa’’ hattono; tayxe sasu diri albaanni Tigirayete Afiinni ‘’Wogahta’’, Sodaami Afiinni ‘’Bakkalcho Gaazeexa’’ attamo hanaffinoha ikkanna; sai 2015M.D kayinni Sumaaletenna Affaarete Afuubbanni onlaynete loossa hanafoonni.
Bakkalcho Gaazeexino Sidaamu daga dhaggete Gaazeexa ikkasi coyi’rinohu kalaa Fiqaadu; gobboomu deerrinni babbaxxitino qooxeessubbara assinannita latishshu, dimokiraasetenna danchu gashshooti hajubbanna loossa Sidaamu Afiinni dagate iillishate hattono Sidaamu daga bude balchooma, latishshunna danchu gashshooti loossa wolootu daga affanno gede assateno mashalaqqe soorri’rate ragaanni Gaazeexu attamamasi noosi qeechi luphiima ikkinota huwachishino.
Babbaxxitino amadonni yannate mashalaqqenna rosicho ikkitanno hajubba nabbawaanote iillishate loonsanni hee’noonniha ikkanna; albillichono Gaazeexu amado woyyeessatenninna attamote kiiro lossatenni dagate hala’ladunni iillishate hattono mashalaqqe saysate calla ikkikkinni eote buichono assate dandiisiissanno haaroonshu loossa loonsannita xawisino
“Bakkalcho Gaazeexira aantanno yanna xawaabbaho” yiinohu kalaa Fiqaadu; Gaazeexu attamo hanafantunkunni xaa geeshsha mommodda nookkiha sufino garinni attamamanni nabbawaanote iillanno gede Sidaamu qoqqowi mootimma assitanni noo jawaata irkora galata shiqishino.
Amsaalu Felleqe
Bakkalcho Bocaasa 13, 2016 M.D
