Hawaasa: – Bakkalcho gaazeexi Federaalennitanna qoqqowu mashalaqqe dagate umise qaalinni iillishanni noo gaazeexa ikkasinni; daga ikkadu garinni afidhanno gede qoqqowu mootimma irko assitanni suffannota Sidaamu Qoqqowi Mootimmate Kominikeeshiine Biiro egensiissino.
Mootimmate Kominikeeshiine Biiro Sooreessi Kalaa Woseniyelleh Simioonihu Bakkalcho gaazeexi ledo assino keeshshonni; Bakkalcho gaazexi Sidaama Federaaletenni sae kalqete deerrinni afamanno gede assino gaazeexaati yiino. Kuni gaazeexi Federaalennitanna Qoqqowu mashalaqqe daga umise qaalinni afidhanno gede assanni dhagge borrotenni maareekkanni noo daafira qoqqowu mootimma irko kaajjite suffannote yiino.
Kalaa Wosenyelleh, “Kominikeeshinete biirohu mittu loosi elektiroonikisete ikko gaazeexunni hattono dijitaaletenni dagate isilanchonna halalaancho ikkitino mashalaqqe iillado assa ikkinota xawise; Bakkalcho gaazeexi widoonni amadante noo mashalaqqe dagate iillishate looso biiro kaajajdu garinni irkissanni no; xaano hegersitino doogonni Bakkalcho gaazeexa qoqqowaho heedhanno battalara beeqqaancho assatenni sa`ne gaazeexuno dagate iillado ikkanno gede baxxitino harunso assinanni irkisate looso loonsannita kulino.
Daga isilanchonna yannite mashalaqqe afi`rate qoosso noonsata kulinohu sooreessu; qoqqowunni kayse eela woraddate geeshsha noo kominikeeshinete massagaanonna ogeeyye dagate halalaancho mashalaqqe iillishate gadachu noonsata xawisino.
Muli yanna kawa harinsoonni battalara kominiikeeshinete looso keennoonniha ikkanna, dagate halalaancho mashalaqqe iillishate widoonni foonqe nootano buunxoonni yiino sooreessu.
Kalaa Woseniyelleh xawishshi garinni, Dagate halaalanchonna ikkado mashalqqe iillishate balanxe tantanote wodho qixxeessate. Daga ikkadu garinni mashalaqqe afidhanno gede mootimma loossino loosi giddo mittu Mootimmate Kominikeeshine biirote garinni tantanamsenni qoqqowu giddo jajjabba owaante uytanno biiro ledo kaabinete miilla ikkitinohura, mixonna ripoorte mule hee`ne macciishshine, kaajjilenna laanfe bande dagate mashalaqqe aate dancha kaayyo no.
Mashalaqqe garunni dagate iillitanno gede umo assine tantano biddi assate looso lonsoonnita kulinohu Biirote Soorreessi; dagatenna mootimmate mereero jawa buusa ikkitinota Kominikeeshinete tantano kaajja nooseta qummeessino.
Mootimmatenna dagate mereero kaajjadu buusi hoogiro, daganna mootimma xaaddannokkita buuxisinohu Sooreessu; Mootimma daga wodhitinota ikkasenni mashalaqqe afidhanno qoossonsa buuxisiissannota kulino.
Dagatenna mootimmate mereero e`e bulbultannota kaphu mashalaqqeno heedhannokki gede gargarate baalante biiro gidddo noo Mootimmate kominikeeshine tantano kaajjado ikka noosetano kulino.
Kalaa Woseniyelleh,”Danchu gashshooti, latishshu xa`mo, ga`labbonna seeru aliidimma buuxisate, qoleno huluullo nookki garinni dagate mashalaqqe iillishate loosi kaajje sufanno” yiino.
Abrahaam Saamueel
Bakkalcho Bocaasa 13, 2016 M.D
