Addis Ababa:- Rosiinsanni maxaaffa anje gatisate rosu maxaaffa rosu minnara tuqissanni afantannota Sidaamu qoqqowi rosu biiro egensiissu.
Sidaamu qoqqowi rosu biiro layinki sooreessi kalaa Miliyoon Yosa Itophiyu Pireesete uurrinsha ledo assino hasaawinni xawisanni; qoqqowoho baalunku rosu deerrinni 1.4 Miliyoone ali rosaano rosu basera afantinota kule; rosu maxaaffa anje gatisate 346 Miliyoone ali birra gaamme maxaaffa attamisiinsoonnita xawisino.
Haaro rosu amanyoote kaima assatenni 1 Miliyoone 19 kume 813 maxaaffa attamisiinse rosu minnara iillinshoonnita egensiisino.
Umi dirimi rosu minnara 711 kumenna 14 maxaaffa, layinki dirimi rosu minnara 443 kume 373 maxaaffa tuqisate qixxeessinoonni yiinohu kalaa Miliyooni; baajeettete dirinni 592 kume 536 maxaaffa attamisiisate garafo fushshine harinshote aana hee’noonnita huwachishinno.
Kalaa Miliyooni xawishshi garinni; mittetenni shoole kifile geeshsha noo rosaano nabbawatenna huwatate dandoonsa lossate irkishshu maxaaffa shiqishate loosi kaajje sufa noosi. Xaa yannara 518 umi dirimi rosi minna hedote giddo wortinota irkishshu maxaaffa attammanni hee’noonni Rosu amanyooti sa’u dirra giddo haammata mitiimmubba giddo keeshshinota kayise; xaa yannara haaro rosu amanyoote qixxeessine gumula handaaru woyyaambera injoo kalaqannota qummi assino.
Maxaaffate attamo tuqishshinna rosu amanyoote woyyeessate ogeeyyenna dureeyye irko assate widoonni uminsa qeecha fultanno gede woshshatto assino.
Qiddist Gezaheny
Bakkalcho Bocaasa 6, 2016 M.D
