Abbayi kofattora e’’o gamba assate hananfoonni millimillonni qoqqowu deerrinni 150 Miliyoone birra e’’o gamba assate mixo amandoonnita qoqqowu hiddaasete kofatto gatamarshi dagate beeqqo qineesso borro mini egensiisino.
Itophiyu pireesete uurrinsha ledo bilbilunni hasaawa assinohu qoqqowu Abbayi kofatto gatamarshi dagate beeqqo qineesso borro mini sooreessi kalaa Kifle Hammeessohu xawisanni; tenne doyichonni qoqqowu deerrinni 150 Miliyoone birra e’’o gamba assate hende loonsanni hee’noonnita coyi’rino.
Kofattote e’’o gamba assate boowe Sidaamu qoqqowo Birra 30,2016 M.D e’inoha ikkanna; aantete noo 20 barrubbara qoqqowoho afantanno zoonna baalanta doyitannota kulinohu sooreessu; Bocaasa 20,2016 M.D xaphi assinannita uurrinshankera xawisino.
Boowe qoqqowoho keeshshitanno yanna giddo xaphoomunni 150 Miliyoone birri ali e’’o gamba assate hende millinsanni hee’noonnita kule; xaa geeshsha noo harinshonni konni albinte gede dagate beeqqonna kakkaooshshi lowontanni dancha ikkinota xawisino.
Tenne jawa gobbomu hajo baalanti Itophiyu daga gobbatenna dagoomittete mittimma agarantino gedeenni poletiku badooshshinni babbaxxitukkinni irkissanno gedenna jawaantetenni e’’o gamba assate kakka’anno gede sokkasi sayisino.
Amadisiisatenni qoqqowoho afantanno zoonnanna woradu gashshootta adhitino mixo garinni jeefisate kaajjishshenna murchi’raanchimmatenni loossanno gede borrote mini sooreessi kalaa Kifle huwachishinno.
Hawaasi quchumi kantiibi kalaa Mekuriyi Mershayehu isi widoonni , Abbayi kofatto e’’o gamba assate boowe Hawaasi quchumira keeshshitino sase barrubba giddo 27 Miliyoone birra Gamba assinoonniha ikkanna kofatto wo’mante Itophiyu daga uminsa dhukinni hanaffe jeefisatenna mittimmate xawishsha ikkase xawisino.
Quchumu deerrinni uyinoonni mixo garini 30 anga xibbuunni ale jeefisa dandiinoonnita kulinohu Kantiibu; quchumu teesaano beeqqisiisatenni e’’o gamab assate loosi kaajje sufannota xawisino.
E’’o gamba assate loosi qoqqowoho baalante zoonnaranna quchumu gashshoottara Bocaasa 20, 2016 M.D jeefamanno.
Qiddist Gezzaheny
Bakkalcho Bocaasa 6, 2016 M.D
