Gobbate gede 2030 woshshu dhibba co’o assine hunate amandoonni mixo kaima assatenni qoqqowohono millimmo hananfoonnita Sidaamu qoqqowi saadate jiro latishshi biiro xawissino. Biiro 2016 M.D 23 kumenna 800 woshshira kittibaate aate mixo amaddinota kulloonni.
Sidaamu qoqqowi Saadate jiro latishshi biiro layinki sooreessinna saadate fayyimmanna e’’o handaari sooreessi dokter Miliyoon Yose Itophiyu pireesete uurrinshara xawisino garinni; qoqqowu gede millimmo hananfoonni. Baxxinohunni hajo la’annonsa bissa ledo qinaambe, miidiyubba horonsi’ne dagoomaho huwanyo kalaqate looso loonsanni hee’noonni yino.
Ledoteno jajjabba Hospitaallaranna Fayyimmate mereershubbara woshshu dhibbi ledo amadante dagganno gawajjonna malaatta huwachishatenna malaattano badate hattono woshshano kattawisiisatenna badate looso mitteenni loonsanni afammeemmo yinohu dokter Miliyooni; sai diro gobboomu deerrinni qixxeessinoonni bare qoqqowoho Hawaasi quchumira woloottu qoqqowubbanni koyisantino wosinna afantinowa harinsoonnitanna qoqqowoho qara qara quchummara lawishshaho; Hawaasa, Yirgaalamete, Alatta wondo, Alatta cuukkote, Daalle, Wondogennetetenna labbino quchummara xaphoomunni 13 kumenna 200 woshsha kattawisiinsoonnita kayisino. Ledoteno huluullammanni qarqarto bandoonnita lede xawisino.
Tayxeno togoo looso lende loosate qixxaawo assinanni hee’noonnita kule; 2016 M.D 23 kumenna 800 woshshira kittiwaate aate mixo amande loonsanni hee’noonni yiino.
Dagoomu giddo woshshu dhibbi malaatta heedhuro dagoomu fayyimmate inistituute widoonni iillitannonke mashalaqqe kaima assatenni harunso assineemmo yiinohu sooreessu; xaa geeshsha togoo ikkito kalaqantinokkita coyi’rino.
Jeefoteno dokter Miliyooni, sokkasinni woshshu dhibbi baalanka iibbado mundeete seele noonsa saadanna manna gawajjanno dhibba ikkasinni; dhibbunni amadammihu gedensaanni xagisi’ne hurate kaayyo ruukkado ikaksenni dagoomu jawa qoropho assanno gede huwachishinno.
Kunino woshshu ledo mitteenni hee’rate rosichi noonke daafira mini giddo lossi’nanni woshsha barru barrunku amalenna ikkito harunsa, gobbara fulte wole woshsha ledo xaadde higgano woyte mitte mittenta ikkitonsa wodanchanna fayyimma agadha hasiissannota duu’re xawisino.
Abbebech Maatewoos
Bakkalcho Bocaasa 6, 2016 M.D
