Addis Ababa:- Owatamaanotenna awaataanote mereero suwashsho kikkisama heedhannokki gede assatenni moora ajishate loonsannita xaphoomu ministirchi xawisi.
Xaphoomu ministirchi Abiy Ahimed (D/r); dagate riqiwamaano amaale mine afamatenni miillatewiinni shiqqinosi xa`mubbara xawishshanna dawaro uyino.
Mooru uurrinsha diigannotanna gobbate lopho ciiggishannota xawisannohu xaphoomu ministirchi; Itophiya labbino buxicho gobbara mooru hala`lanno woyte baxxinohunnino daga owaanteemmo yino manni mooranno woyte gobbate lopho buuxa qarrissannota ikkase coyi`rino.
Xaphoomu ministirchi Abiy Ahimed (D/r); mooru uurrinsha diigganno huqa ikkinota xawise; moora heddannori heddannokki gede assanno Baalaamooti yiino.
Mooru Wo`mu wodaninni coyra, loosa, dagate ledo xaada dandiisannokki kotticha assannoha ikkasi kaysatenni; moora sharrama shota hajo ikkitinokkitano qummeessino.
Mootimmate deerrinnino luphiima qorqorshu loossa harinsanni hee`noonnita xawisino.
Piroojekitubbate aana kaajjado qorqorsha assinannihura moora ajisha dandiinoonnita xawisinnohu xaphoomu ministirchi Abiy Ahimed (D/r); manaadda mussinnu qarrubba seejjate budu sharro, seeranna amanyoote lossa, siiviil serviisete rifoorme gumulanna mootimmate owaantubba dijitaalete widira soorra hasiissannota coyi`rino.
Haammatu seerunni xa`mantanno gede assinanni hee`noonnitanna basensanni ka`anni nooha ikkirono; xaano mooru jifo digooffino yiino.
Xaa geeshsha eo gamba assa lede 190 ale ikkitanno mootimmate owaantubba dijitaalete widira soorrantinota kule; kunino kaajje sufannotaati buuxisinohu.
Ikkinohurano owatamaanotenna awaataanote mereero suwashsho kikkisama heedhannokki gede assatenni moora ajishate looso loonsannita xaphoomu ministirchi Abiy Ahimed (D/r) buuxisino.
Abbebech Maatewoos
Bakkalcho Bocaasa 6, 2016 M.D
