Seeda yannara rosu aana kalaqantino hiiqqamme sissate haammata haaroonshu looso loonsanni hee`noonnita IFDR xaphoomu Ministerichi Abiy Ahimed (Dr) xawisi.
Xaphoomu Ministerichi Abiy Ahimed (Dr), 6ki Dagate Riqiwamaano Amaale Mininni 3ki diri loosu yanna,4ki uurrinshu songo aana miillatewiinni ka`ino xa`mora dawaranni; yiinonte gede, rosu hiiqqamme seeda yannate; konne ontu diri giddo kalaqantinota calla dikkitino; konnira kalaqantino hiiqqamme sissate haaroonshu looso loonsanni hee`noonni.
Xaphoomu Ministerichi Abiy, “Rosu hiiqqamme seeda yannara kalaqante dagginote; rosu aana loosa hoongiro gobba jawa gede badhera qolanno” yaatenni soorrote albaanninna gedenoonni Rosu aana duuchu dani hasaawa harinse torbinoonnita xawisino.
Xaphoomu Ministerichi xawishshi garinni, rosu isilanchimma hunate adhitanno yanna boode ikkiturono; hiiqqamme sissate kayinni seeda yannanna daafuro xa`manno. Konni daafira yaanno ministirichu; konni daafira, baalunku hexxo murrummokkinni sharrama hasiisanno yaanni huwachishino.
Rosu hiiqqamme sissate 7 qara qara ikkitanno haaroonshu hayyo qunxe fushshinoonnita xawisinohu Xaphoomu Ministirichi; kunino rsou amuraate soorra, rosiisaanote dhuka jawaachisha, roso gashshinanni hayyo soorra, umi diriminni hananfe safote latishsha halashshanna wonsha, rosaanote fonqoli amanyoote soorra, rosaano rosu mine heedhe sagale afidhanno gede assanna, Yuniversite halashsha agurre rosu isilanchimma aana loosanna ogimmate kolleejjubba halashsha ikkinota buuxisino.
Sa’u onte dirrara mitteno haaro Yuniveristeno ijaarroonnikkita xawisinohu Xaphoomu Ministerichi Abiy Ahimed (Dr), daaimu hoshsho aana loosatenni 18 kume ikkitanno daaimu hoshsho rosu minna ijaarre owaante uytanno gede fano assinoonnita xawisino.
Hakiinni sunfe umi dirima, layinki dirimanna qixxaawote rosu minna halashshate loosono tenne riifooreme giddo loonsoonni. Qoleno, 1400 ikkitanno ogimmate rosu minna ijaarroonnita qummeessino.
Rosu isilanchimma baalanka hanqaffino garinni seeda yanna adhine soorro abbinanni ikkinninna, mitte soodo dagganno soorro ikkitinokkita Xaphoomu Ministerichi Abiy Ahimedihu (Dr) huwachishino.
Xaphoomu Ministerichi ledanni, Xa tenne yannara rosaanote guma lainohunni dayno gumi ajo batiro agarroonni guma ikkinota qaagiisse, fonqolu amuraati soorramino ikkinnina, fonqolu isoontilla disoorramino; yannano iseetilla yee Amaalete Mininni ka`ino xa`mora dawarino.
Rosaanote gumi ajate korkaatinni rosaanote maate jawa gede yaaddinoha nafa ikkiro, oosonke heeshshote fonqolinni ubbankunni mitte yanna fonqolo ubburo woyyanno; techo fonqolinni guma abba hooga ga`a umboonniwinni dika`neemmo yaa ikkitukkinni wirro rosa dandiinanni doogo cufantinokkita amaalino.
Gobbate giddo ijaarroonni ogimmate kolleejjuwa 6 -kumi ali rosaano haa`ne rosiisate dhuki noota buuxisinohu Xaphoomu Ministirichi ikkollana, ogimmate rosi minnara e`e rossanno rosaanote kiironna hasatto ajjinote kulino.
Kalqenkera tekinoloje kalaqqe halashshitinori ogimma noonsa rosaano ikkitinota buuxisinohu Xaphoomu Ministirichi, konnira, rosaano egennono ogimmano afidhinore ikkitanno garinni rosu isilanchimma woyyeessinanni ha’nanni looso loonsanni hee`noonni yee dawarino.
Abrahaam Saamueel
Bakkalcho Bocaasa 6, 2016 M.D
