Yayye:- Sidaamu Dagoomu Qoqqowi Mootimma Saadate Jiro Latishshi Biiro 2016 M.D saadate sircho woyyeessate millimillo bare faajje assitu.
Sidaamu Dagoomu Qoqqowi Mootimma Saadate Jiro Latishshi Biiro 2016 M.D Saadate sircho woyyeessate millimillo bare Mereerimi Sidaami Zoone Harbagoonu Woradira Yayyete sa’u sanyo faajje assitino.
Faajje assate amuuraati aana afame hasaawa assino barru wosinchi Sidaamu Qoqqowi Mootimma Aantichu Pirezidaantichinna Rosu Biiro Sooreessi Kalaa Bayyani Baraasihu; qoqqowu mootimma qoqqowu daga heeshsho soorritanno loossa loosate mixidhe millissanni noo gede xawisino.
Konni kaiminnino quchumahono ikko baadiyyete heedhanno xaphooma qoqqoqwu daga taalo horaameessimma buuxisiissanno loossa wo’munku qooxeessira tuqisate mootimma kaajjite loossanni no yiinohu kalaa Bayyani; konninnino mootimma dagate ledo loossino loosinni woyyaawino gumi daanni afamanno yiino.
Mootimmate gede Sidaamu Qoqqowira ruukkado baattora hala’lado daga heedhannoha ikkasinni, woyyawino saadate sirchi aana illachisha qara hajo ikkitino gede bandoonnitano qummeessino.
Kalaa Bayyani, yanna jirote bikka saadate kotte batinyinni calla bikkinanniwiinni saino gede huwachishe; woyyaawino saadate sirchi aana illachishatenni boode saadanni lowo jiro gamba assa doorshu nookki hajo ikkitino gedeno coy’rino.
Woyyaawino saadate sirchi dagate heeshsho lowohunni soorranni afamanno handaara ikkasinni mootimma murci’raanchimmatenni loossanni afantanno. Daganna wedelluno konni handaarira bobbakke heeshshonsa soorritanno gede Kalaa Bayyani, sokkasi saysino.
Harbagoonu woradira saadatenna lukkuwu latishshi handaarira bobbakkino maamarrano toyaanyo assinoonniha ikkanna; maamarra konni handaarira bobbahansanni gumaamma ikkitino gede xawisse; woluno konni handaarira bobbahe heeshshosi woyyeessanno gede amaaltino.
Ikkollanna, safote latishshi Caabbichu, wayinna doogote mitiimma loosinsara guffa ikkitinonsahura mootimma konne qarra tirtannonsa gede woxaratto shiqishidhino.
Sidaamu Qoqqowi Saadate Jiro Latishshi Biiro Sooreessi Kalaa Tekile Jombahu isi widoonni, albira dagate giddo woyyaawino saadate sirchi dhibba di-dandaanno yaanno laooshshi noo gede qaagiisse, xaa yannara kayinni loonsoonni huwanyo kalaqate loosinni so’rino laooshshe soorrate dandiinoonnita coy’rino.
Sai 2015 M.D 4,000,000 lukkuwa beehatenna mixi’ne 4,043,000 lukkawa hattono 101,000 saadate sircho woyyeessate mixi’ne 102,000 saada sircho woyyeessa dandiinoonnita xawisinohu biirote sooreessi; tayxe diro 150,000 saadate sircho woyyeessatenna 8,000,000 lukkawa beehate mixi’ne loonsanni hee’noommo yiino.
Saadate latishshi handaarira bobbakkino maamarra kayisidhanno safote latishshi mitiimmubba daafira xa’mo shiqqinosihu qoqqowu saadate jiro latishshi biiro sooreessi Kalaa Tekile Jombahu, Harbagoonu Woradi Mereerimi Sidaami Zoone giddo jajjabba handaaru pirojekittubba noo qooxeessa ikkasi coy’re; konnirano hasiisanno safote latishsha wonshate loossa federaaletenna qoqqowu mootimmanni loosantanni no yiino.
Harbagooninni Hawaasa massitano kolishsho doogo federaalate mootimmanni loosantanni afantanno. Caabbichu widoonni leeltanno qarrubbano tirate Harbagoona korreentete tiransiformere qasatenni korreentete qarra muli yanna giddo tirreemmoha ikkannono yiino.
Addisu Adoola
Bakkalcho Bocaasa 6, 2016 M.D
