Gobboomu Gutu Amaalammete Komishiine ledo gutunni loossanni noota Sidaamu Qoqqowi giddo millissanno hettisamaano poletiku paartuwa egensiissu.
Sidaamu Wolaphote Millimillora Qara Sooreessa Ikkinohu Kalaa Laggasi Laanqamohu Itophiyu Pireesete uurrinshara xawisinonte gede, Itophiyu Gutu Araarshunna Amaalammete Komishiine xintamasehu qaru coyi, gobbate giddo ka`anno gaanceranna sumuu yaa hoogate qarra hasawunni calla tirate uurritino uurrinsha ikkase xawise; Sidaamu Wolaphote Millimillo paartete gede Gutu Amaalammete komishiine ledo sumimme kalaqqe loossanni noota buuxisino.
Kalaa Laggasi xawishshi garinni, Gutu Amaalammete Komishiine uurrase korkaati qaru gobbate deerrinni kalaqamino qarra, gobba gea hooga, gosa gosanniha, qoqqowu qoqqwu ledo noo sumimme hoogate mittiimmanna babbaxxitino hasatto korkaatinni koffi yitno daga mereero noo roqqo tirate ikkinota buuxise; qaru coyi kayinni gobba suffanno gede assate yiino.
Gobboomunniti Gutu Amaalammete komishiine uurrase Itophiyaho doorshu nookki hajo ikkitinota xawisinohu Kalaa Laggasi, komishiine ayeno babbbadukkinni baalanka hanqafino garinni, sircho, amma`no, hattono gare la`ukkinni loossuronna ayimmate xa`mo kaayse noohano taalo ikkino garinni hasaawisse qarrasi buuxxuro, uurritinoti Gobboomu Komishiine gobbate keere abbitanno yee hedannota buuxisino.
Kalaa Laggasi xawishshi garinni, Gobboomu Amaalamishshu Komishiine mereero mootimma ea hoogguronna hasiisannorichi callunni irkissuro gumu danno. Kayinilla, tenne yannara kalaqamanni noohu loosu hoongi, heeshshote oolto, danchu gashshooti qarri, mannu kiiro lexxa, qaccubbate kalaqantanni noo gaance hattono kalqete noo olinna urde hee`rate korkaatinni harinsho gufidhannokki gede baalunku qeechasi fula hasiissanno yaanni qummeessino.
Poletiku paarte hee`rate korkaati gobba heedhuro ikkinota xawisinohu Kalaa Laggasi, gobbate gede amadinonke qarra tirate mittimmate aana loosa, hedote babbadooshshi nafa hee’riro balaxisiisa hasiissannohu gobbate mittimmara ikkinota huwachishino. Konne paartenke ammante Komishiinete ledo loossanni noota kulino.
Duuchante Sidaamu Daga Dimokiraasawete Paarte Massagaanchi Kalaa Tesfamariyaami, Gobboomu Gutu Amaalamme Komishiine xaa geeshsha ninke miila assite adhate dawaro qola nafa hoogguro, Itophiyu gutu gobba ikkinohura baalanta daga sumuu assitanno hedo aana loosate paartenke qixxaabbe noo yaanni egensiisino.
Kalaa Tesfamariyaami yaatto garinni, Duuchante Sidaamu Daga Dimokirasawete Paarte millimmo, Gobboomu amaalammete komishiine loossanni noo looso duuchante yannara irkissanni afantanno. “Baalanta daga hanqaffe, sirchu, gare, ayimmate badooshshi nookkiha kayinni loosa noonsa” yaannino qummeessino. Sidaamu giddo milli yitanni noori hettisamaano poletiku paartuwa poletiku gutu amaale mine xaadooshshu noo yannara tenne hedo kaayinse sumuu yine gobba geisate loonsanni hee`noommono yiino.
Abrahaam Saamueel
Bakkalcho Birra 29, 2016 M.D
