Qansoota loosu kaayyo horaameeyye assate baalanti hajo la`anno bissa qinaambetenni loosa hasiissannonsata Sidaamu qoqqowi jireenyu paarte sinu borro mini sooreessi kalaa Abirahaam Marshallohu xawisi.
Sooreessu Konne xawisinohu Sidaamu qoqqowi loosu, dandootenna interpirayizete biiro 2016 M.D millimmote ba`re harissu yannaraati.
Millimmote bare aana afamatenni sokka sayisinohu qoqqowu jireenyu paarte sinu borro mini sooreessi kalaa Abirahaam Marshallo coyi`rino garinni; qansoota loosu kaayyo horaameeyye assate baalanti hajo la`anno bissa qinaambetenni loosa hasiissanno.
Qansootu loosu kaayyo horaameessimma aana qoqqowu gede leeltanno soorro borreessiisate qinaambete loosu hayyubba kaajjisha hasiissannotano qummeessino.
Manchi beetti heeshsho soorrantannohu loosunniiti yiinohu kalaa Abirahaami;qoqqowoho baalanti hajo la`annonsa bissa loosu kaayyo kalaqo aana assitanno halammenni guma borreessiinsanni afammanniha ikkirono; millimmote bare aana assinanni hasaawinni qarrubba xawo fushshate malaho ikkado qixxaawo assatenni foonqubba rahotenni taashsha hasiissannota kalaa Abrihaam Marshallohu duu’re xawisino.
Qoqqowu loosu dandoonna interpirayizootu latishshi biiro sooreette dukko Hageretsiyoon Abbebeti ise widoonni xawissino garinni; 2015 baajeettete dirinni babbaxxitino handaarranni qansootaho loosu kaayyo kalaqantannonsa gede hajo la`anno bissa ledo qinaambetenni biiro loossanni keeshshitino.
Loosu kaayyo kalaqonninna loosu kaayyo injeessate aana leeltanno soorro abbate baalanti massagaano murci’raanchimmatenni millisa noonsa yitino sooreette.
Abbebech Maatewoos
Bakkalcho Birra 29, 2016 M.D
